Abraham uponjo wode ma Isak nia emar Yehova man egen lembang’ola pare ceke. Re kinde ma Isak udoko ku oro 25, Yehova ukwayu Abraham utim lembe moko ma timo tek. Ebino lembang’o?

Mungu uyero ni Abraham kumae: ‘Kawono gam wodi ma kulong’, man cidh ithiere ira ni lam iwi got moko i ng’om mi Moria.’ Abraham ung’eyo ngo thelembe m’uketho Yehova ukwaye nia etim kumeno. Re asu eworo Yehova.

Urwonde pir kugweno, Abraham uting’o Isak man jutic pare ario, man gicoko woth pi nicidho i ng’om mi Moria. I ng’ei woth mi nindo adek, gigam gineno kum gotne ku bor. E Abraham uyero ni jutic pare nia gikurgi keca kinde ma fodi gibecithiero lam gikud Isak. Abraham ugam uketho Isak uyeyo yen ma gibiwok kudho ko mac, en ke emaku palamularu i cinge. Isak ugam upenjo won kumae: ‘Nyathi rombo ma wacithierone ni kani?’ Abraham udwoko ire kumae: ‘Woda, Yehova biwomio.’

Saa ma gitundo iwi got kuca, gigiero pemblam. E Abraham utwio cing Isak ku tiende de, man ekethe iwi pemblam.

Kinde m’Abraham ung’ayu palamularu, malaika pa Yehova ugam ulwong’e niai kud i polo, ‘Abraham! Kud itim nyathin rac! Kawono ang’eyo nia itie  ku yioyic i Mungu, kum iyio nithiero wodi.’ Abraham ugam uneno nyog urombo moko umoko i kind yen. E egonyo Isak nyapio pio nica.

Niai cing’ nica, Yehova ucaku lwong’o Abraham nia jarimbe. Nyo, ing’eyo nia pirang’o? Abraham ubed utimo lembe ceke ma Yehova ukwayu i bang’e, kadok saa m’enyang’ ungo i thelembene de.

Yehova udwogo kendo iwi lembang’ola m’etimo ni Abraham kumae: ‘Abimio iri mugisa man abinyayu nyithindho peri man nyikweyi.’ Eno unyutho nia ni kum Abraham Yehova bimio mugisa ni dhanu ceke m’atira.