Yehova ung’olo ni Yakobo nia ebigwoke calu m’egam egwoko Abraham gikud Isak. Yakobo ubino kwo kaka moko ma julwong’o Haran; kuca ewok egamu mon, ginyolo awiya lee, man elony.

I ng’eye, Yehova uyero ni Yakobo kumae: ‘Dok i ng’om ma thu.’ E Yakobo ku juruot pare gicoko woth ma bor pi nidok i ng’om ma thugi. Kinde ma gini gengi, jutic pa Yakobo moko gibin giyero ire kumae: ‘Esau m’umeru bebino, ewotho ku dhanu 400!’ Lworo ugam umaku Yakobo pilembe egeno nia Esau biwotime rac ku juruot pare. E ekwayu Yehova kumae: ‘Akweyi, bodha kud i cing umira.’ Urwonde, Yakobo uoro giramia dupa ni Esau: eoro rombe, diegi, dhieng’, ngamia man kana.

I diewor nica, saa ma Yakobo ubino kende, eneno malaika moko! E Yakobo umake kikiki, ento malaikane bino timo kero kara evudhere. Ginyego kumeno nitundo i dhu kugweno. Kadok Yakobo unwang’u ret de, re evoc ungo. Malaikane uyero ire kumae: ‘Wek acidhi.’ Yakobo udwoko ire kumae: ‘Aweki ngo ka fodi imio ngo ira mugisa.’

E malaika umio mugisa ni Yakobo. Eno uketho Yakobo ung’eyo nia Yehova biweko ngo Esau utime rac.

 Kinde ma piny uru, Yakobo uneno Esau ku dhanu 400 gibebino. Yakobo ular ukadhu i wang’ juruot pare, ecidh erum i wang’ umin wang’ abiro. Esau de ring’ini i bang’e man egwake. E umego ario maeno giywak, man i ng’eye giripo kindgi. Lembe ma Yakobo utimo pi niripo kindgi gikud umin unyayu anyong’a lee i Yehova, kumeno ngo nia?

I ng’eye, Esau udok yo pare man Yakobo de gimediri ku woth migi. Yakobo ubino kud awiya ma co 12. Nying’gi ni e: Ruben, Simeon, Lawi, Yuda, Dan, Naftali, Gad, Acer, Isakar, Zebulon, Yosefu, man Benjamin. Yehova utio ku ng’atu acel m’i kindgi ma nyinge Yosefu pi nibodho dhanu pare. Nyo ing’eyo nia etio kude nenedi? Wabineno.