Kinde ma Yosefu ubino i kol, Farao m’ubimo mi Misiri uleko lek moko. Ng’atu moko acel de mbe m’utuc nikoro the lekne. E jatic pa Farao acel unyutho ire nia Yosefu copo koro the lek pare. Ndhundhu nica Farao uoro jucidh julwong’o Yosefu.

Farao upenjo Yosefu kumae: ‘Nyo icopo koro the lek para?’ Yosefu udwoko kumae: ‘Cam bicek lee i Misiri pi oro abiro, man kec bidopodho pi oro abiro. Dong’ ng’ii ng’atu moko ma riek ucok cam i dero kara dhanu peri kud utho ku kec.’ E Farao udwoko kumae: ‘Ang’io de in! Ibibedo ng’atu mir ario ma won tego i Misiri!’ Ng’a m’ukonyo Yosefu kara eng’ei the lek pa Farao? Utie Yehova.

Pi oro abiro m’ulubo, Yosefu ucoko cam lee. E kec ugam upodho iwi ng’om zoo calu ma Yosefu uyero. Dhanu ubed uai kaka ma tung’ tung’ pi nibino ng’iewo cam i bang’ Yosefu. Saa ma Yakobo ma won uwinjo nia cam utie i Misiri, eoro awiya pare gicidh ging’iew cam kuca.

Wot Yakobo gicidho i bang’ Yosefu. Yosefu uwok ung’iogi wang’ acel. Ento gin ging’io ngo Yosefu. E girum piny i wang’e, tap calu m’egam eleko saa m’ebino aradu. Yosefu umito ekeng’ei ka nyo fodi asu umego pare gitie kud adegi. Eyero igi kumae: ‘Wubino i ng’om mwa pi nineno kaka ma wucopo maku.’ Giyero ire kumae: ‘Ungo! Watie umego 12, waai i Kanan.  Umegwa acel udaru tho, ma cogo ke udong’ ku wegwa.’ Yosefu uyero igi kumae: ‘Wukel umegwu ma cogo i bang’a, kan abiyio nia wuyero lemandha.’ E gidok i bang’ wegi i pacu.

Kinde ma cam uthum ni juruot pa Yakobo, eoro wote kendo i Misiri. Gicidho bende ku Benjamin m’umegi ma cogo. Pi nimulo i umego pare, Yosefu ukanu kopo pare mi mola ma tar i saki pa Benjamin, man eketho juriemo tokgi nia gikwalu kopo pare. Kinde ma jutic pa Yosefu ginwang’u kopone i saki pa Benjamin, ndiri ugam umaku umego pare. Gikwayu Yosefu nia timba emii matira igi kakare nimio ni Benjamin.

Kawoni dong’ Yosefu ung’eyo nia umego pare gidaru lokiri. Pieno eromo medere ngo asu nimung’ere igi. Ecaku wak man eyero igi kumae: ‘Atie Yosefu m’umegwu. Fodi vwa tie kwo asu?’ Dhug umego pare uthwo kaw! Yosefu uyero igi kumae: ‘Cwinywu kud upidi pi lembe ma wutimo con i kuma. Mungu re m’uora pi nigwoko kwo mwu. Kawoni, wucidh wugam baba pio man wukele kuni.’

Gigam gidok pio pio i pacu man gikoro lembe ma ber maeno ni weggi. E gicidho kude i Misiri. I ng’ei ma Yosefu gipokiri giku won pi oro ma lee, gidok ginwang’iri kendo.