Jumisiri gidwoko nyithindho mir Israel ni ng’eca migi, man gibed giketho gitimo tic ma tek. Yehova ugam uoro Musa gikud Harun gicidh giyer ni Farao kumae: ‘Wek dhanu para gicidhi, kara gitim ira i langa.’ Farao udwoko ku kuhaya kumae: ‘Yehova ne e ng’a! Abiweko ngo nyithindho mir Israel gicidhi.’ I ng’eye, Farao umedo tic mange lee ni nyithindho mir Israel. E Yehova unwang’u nia kwayu ekeler wi Farao kara enwang’ ponji. Ing’eyo nia elero wie nenedi? Ekelo masendi apar iwi ng’om mi Misiri. Yehova uyero ni Musa kumae: ‘Farao ubewinja ngo. Urwo kugweno, ebicidho i dhu Kulo Nil. Cidh iyer ire nia calu m’ekwero niweko dhanu para ucidhi, pii mi Kulo Nil zoo bidoko ni rimo.’ Musa uworo dwand Yehova, e ecidho i bang’ Farao. Harun ugam ugoyo Kulo Nil kud uluth pare i wang’ Farao, e pii mi kulone udoko ni rimo. Pii ukwok, rec utho man pige copo madhere ngo. Asu Farao ukwero niweko Juisrael gicidhi.

 Nindo abiro i ng’eye, Yehova uoro Musa kendo i bang’ Farao ku wec ma e: ‘Kan iweko ngo dhanu para gicidhi, ungwal bipong’ i Misiri zoo.’ Saa maeno de Farao uweko ngo Juisrael gicidhi. E Harun uting’o uluth pare man erieye; e ungwal upong’ i Misiri ceke. Ungwal ubino kaka moko ci: i udi mi dhanu, iwi pem, man i sani. Farao uyero ni Musa nia ekwai Yehova kara masendi maeno ujiki. Eng’olo nia ebiweko nyithindho mir Israel gibicidho. Yehova ujigo masendine, e Jumisiri gicaku coko dhug avuj ungwal karacelo. E ng’wic Misiri udoko tik tik ma yerere ngo. Re kendo, Farao ukwero niweko Juisrael gicidhi.

I ng’eye, Yehova uyero ni Musa kumae: ‘Harun bigoyo utur mi ng’om kud uluth pare, man utur bidoko ni uber.’ E ndhundhu nica, uber uromo ng’om mi Misiri ceke. Dhanu pa Farao moko giyero ire kumae: ‘Mungu re m’ukelo masendi maeni i wiwa.’ Re asu Farao uweko ngo nyithindho mir Israel kara gicidhi.