Yosefu ubino nyathin ma Yakobo unyolo ma dong’ eteng’ini; egam emare lee dit. Umego pare ma gijudongo ire gineno nia etie nyathin ma kacwiny won. Nyo, iparu nia lembene ubed ufoyo igi? Kumira ubed unegogi lee i kum Yosefu man gidage. Nindo moko, Yosefu uleko kit lek moko ma nwang’u fodi eleko ngo, man ekoro pire ni umego pare. Giparu nia lekne ubenyutho nia nindo moko gibirum i wang’ Yosefu. E gifodage dong’ magwei!

Ceng’ acel, umego pa Yosefu gibino kwayu rombe ceng’ini kud adhura mi Cekem. E Yakobo uoro Yosefu ucidh unen nia gitie nenedi. Saa ma gineno Yosefu ku bor, giweco i kindgi, giyero kumae: ‘Nen jalek maeni ubebino. Wanege cen!’ Gimake man gibole i vur ma thuc. Ento umin ma Yuda uyero kumae: ‘Kud wanege anega! Walwore ni ng’eca.’ E gilworo Yosefu ni jukuloka m’uai i ng’om mi Midian, ma gibecidho i Misiri; jukulokane ging’iewe sente mi mola 20.

I ng’eye, umego pa Yosefu ginego diel man giroyo bong’u pare i rimbe; gioro bongune i bang’ wegi, giyero kumae: ‘Keng’ii nyo eni tie bongu pa wodi.’ E Yakobo uparu nia lei ma kwiny uyeco i Yosefu. Can umondo lee dit i adundene, ewak man ekwero ku jujuke.

Kinde ma Jumidiani gituc ku Yosefu i Misiri, giwok gilwore ni Potifar m’ubino ng’atu ma pire tek lee, man edoko ng’eca pare. Ento Yehova uweko ngo Yosefu. Potifar uneno nia Yosefu timo tic cuu man etie ng’atu ma jucopo geno. E i ng’ei nindo ma nok, Potifar uketho Yosefu ucak neno wi piny pare zoo.

 Dhaku pa Potifar ugam uneno nia Yosefu leng’ man nia e tek. E nja ci ecaku kwayu nia Yosefu uvut kude. Yosefu utimo ang’o? Ekwero, man eyero kumae: ‘Ungo! Eno tie lembe ma rac. Rwoth para gena, in ke itie dhaku pare. Acopo vuto ngo kudi, pilembe eca nwang’u atimo dubo ni Mungu!’

Nindo acel, dhaku pa Potifar umito maku Yosefu ku kero kara evut kude. Emake ku bongu pare, ento Yosefu uringo. Kinde ma Potifar udwogo i pacu, dhakune uloko nia Yosefu umito make ku kero. Re eno ubino vupo. Ng’ecwiny ugam umaku Potifar magwei, e ebolo Yosefu i kol. Ento wi Yehova uwil ungo ku Yosefu.