Nyithindho mir Israel gitimo oro ma kadhu 40 i langa. I ng’eye, giloyo adhura ma tek dupa i lwiny. I ng’ei ma gitimo nindo ma lee i pambu mi Moab yo nyangu mi Kulo Yordan, e saa ma gimond ko i Ng’om mi lembang’ola ugam uromo. Ndiri ubino nego Balak m’ubimo mi Moab nia gibecidho maye ku ng’om pare. Pieno, egam elwong’o ng’atu moko ma nyinge Balam ubin i bang’e i Moab pi nilamu nyithindho mir Israel.

Ento Yehova uyero ni Balam kumae: ‘Icikiri ngo nilamu nyithindho mir Israel.’ E Balam ukwero nia ecidho ngo. Re ubimo Balak uoro kwenda kendo i bang’e man eng’olo nia ebimio ire piny moko ci m’emaru. Ento wang’ maeno de ekwero. E Mungu wacu ire kumae: ‘Icopo cidho, ento ibiyero kende kende gin m’abiwacu iyer.’

Balam ugam uidho iwi kana pare man eloro i Moab. Epangu nia ebiwok lamu nyithindho mir Israel kadok nwang’u Yehova ular ukwere nia kud elamgi de. I gengi, malaika pa Yehova uwok ire wang’ adek. Balam ubino neno ngo malaikane, ento kana pare re m’unene. Wang’ mi kwong’o, kanane uweko gengi, emondo i lum. Wang’ mir ario, kana ucorere i kum gang’kidi man erudo cong Balam i kum kidi. Wang’ ma tokcen kana ugam uvuto i wang’ gengi. Wang’ adek maeno zoo, Balam ugoyo kanane kud uluth.

I ng’ei m’egoye wang’ mir adege, Yehova ugam uyabu dhu kanane, e eweco. Kana upenjo Balam kumae: ‘Igoya wang’ adek kumeni pirang’o?’ Balam udwoko ire kumae: ‘Agoyi kum icaya. Ka nwang’u pala utie i cinga nwang’u anegi cen.’ Man kana uwacu ire kumae: ‘Iringo kuda pi oro ma lee, nyo adaru timi kumeni de?’

E Yehova uyabu wang’ Balam man eneno malaika cungo i yo. Malaikane uyero ni Balam kumae: ‘Yehova ung’olo iri nia kud ilam nyithindho mir Israel.’ Balam uyero kumae: ‘Adubo andha. Dong’ aloko adok.’ Ento malaika uyero ire kumae: ‘Icopo cidho i Moab, ento ibiwok yero kende kende gin ma Yehova ung’olo iri.’

 Nyo Balam unwang’u ponji i kum lembe maeno? Ungo. I ng’eye, Balam upimo nilamu nyithindho mir Israel wang’ adek, ento Yehova uketho emio igi mugisa, kakare nilamugi alama. Kinde ma Juisrael gikiedo ku dhanu mi Moab, giwok ginego Balam. Nwang’u ecopo bedo lembe ma ber dit ka nwang’u Balam uwinjo dwand Yehova wang’ ma kwong’a.