Yehova uyero ni Musa kumae: ‘Bin i bang’a iwi got kuni. Abikiewo cik para iwi bankidi man abimie i beng’i.’ Musa ugam uidho iwi got man etimo nindo 40 ku diewor 40. Kinde m’ebino kuca, Yehova ugam ukiewo Cik apar iwi bankidi ario man emio bankidine i bang’ Musa.

I ng’ei nindo moko, nyithindho mir Israel giparu nia Musa uwenjogi. Giyero ni Harun kumae: ‘Wamito ng’atu moko utel wiwa. Yik iwa mungu!’ Harun udwoko igi kumae: ‘Wumii ira mola ma kwar mwu.’ Egam etwagu mola ma kwarne ku mac man eyike ni ayi nyathidhiang’. Udul dhanu gigam gikok kumae: ‘Nyathidhiang’ maeni tie mungu mwa m’uwodhowa kud i Misiri!’ Gicaku woro nyathidhiang’ mi mola ma kwar, man gipangu nitimo fet. Nyo eno tie lembe ma cuu? Ungo. I wang’e, ging’olo nia gibiworo Yehova kende, ento kawoni gituro lembang’ola migi.

Yehova uneno lembe m’utimere, pieno eyero ni Musa kumae: ‘Dok i bang’ dhanu. Kum giworo ngo lembe  m’ang’olo igi man giberwo i wang’ mungu m’araga.’ Musa ugam uloro ku wi got, m’emaku bankidi ario i cinge.

Kinde ma Musa uwok ceng’ini ku kagonjo, ewinjo dhanu ubewer. I ng’eye, eneno gibemiel man giberum i wang’ nyathidhiang’. Ng’ecwiny ugam umaku Musa lee mandha. Ebolo bankidi ario m’ubino i cinge i ng’om, e bankidine ugam urungere nzikinziki. Ndhundhu nica enyotho ayi nyathidhiang’ne cen. I ng’eye, epenjo Harun kumae: ‘Ang’o m’ucweli nitundo itimo lembe ma rac kumeni?’ Harun udwoko ire kumae: ‘Ng’ecwiny kud unegi i kuma. Ing’eyo kura mi dhanu maeni. Gikwayu nia ayik igi mungu, e abolo mola ma kwar migi i mac ci ewodho nyathidiang’!’ Nwang’u ukwayu ngo Harun utim lembe maeno. Musa ugam udok kendo iwi got man ekwayu pi dhanune i bang’ Yehova, kara ewek dubo migi.

Yehova ugam uweko dubo mi dhanu ma gibino ayika niwore. M’umbe jiji, pire bino tek lee nia nyithindho mir Israel gilub telowic pa Musa.