Dwi ario i ng’ei ma nyithindho mir Israel giwok kud i Misiri, gigam gituc i kum got Sinai man gigonjo keca. Yehova ugam ulwong’o Musa iwi got, man eyero ire kumae: ‘Abodho nyithindho mir Israel. Ka giwora man giworo cik para ceke, gibidoko thek para ma segi.’ Musa ugam uloro i bang’ dhanu man ekoro igi lembe ma Yehova uyero ire. Nen migi ubino ang’o? Gidwoko kumae: ‘Wabitimo lembe ceke ma Yehova ung’olo iwa nia watim.’

Musa udok kendo iwi got. Kuca, Yehova uwok uyero ire kumae: ‘I ng’ei nindo adek abiweco kudi. Ng’ol ni dhanu nia kud gipim nicoro ceng’ini i kum got Sinai.’ Musa uloro ku wi got man eyero ni nyithindho mir Israel nia giyikiri pi niwinjo lembe ma Yehova biyero igi.

Nindo mir adege, gineno afuru ma col uumo got man polo ubemil. Bende gineno lukoth ubegoyo piny man giwinjo polo ubemor. Yehova ugam uloro piny iwi got i kind mac m’ubeliel. Lworo unego nyithindho mir Israel lee dit man kumgi ubino miel. Got ubino yengere ma rac man ethwogo yiro, man yirone upong’o wi gode ceke. Dwal mir agwara ubino medere ameda. E Mungu uyero kumae: ‘An a Yehova. Icikiri ngo niworo mungu mange.’

Musa ugam udok kendo iwi got man Yehova uwok umio cik pi nikonyo dhanu ging’ei kite m’ukwayu giwore ko man kite ma gicikiri nitimo ko lembe ni jumange. Musa ugam ukiewo cikne man i ng’eye esome ni nyithindho mir Israel. Kinde ma giwinjo cikne, ging’olo kumae: ‘Wabitimo lembe ceke ma Yehova ung’olo iwa nia watim.’ Eyo, gitimo lembang’ola ni Mungu. Re nyo gibiworo lembang’ola migine?