I ng’ei oro moko, nyithindho mir Israel giweko Yehova kendo man gicaku timo ni mungu m’araga. E pi oro abiro, Jumidian giyaku lim mi nyithindho mir Israel man ginyotho cam migi. Juisrael gibed gipondo i odi ng’om man odi cana kara Jumidian kud unwang’gi. Calu ma kwo doko igi tek, gikwayu Yehova ukonygi. E Yehova uoro malaika pare acel i bang’ jalawobi moko ma nyinge Gideon. Malaika uyero ire kumae: ‘Yehova ung’iyi kara ibed jasuda ma tek.’ Gideon upenje kumae: ‘An m’atie gin moko de ngo e, abibodho nyithindho mir Israel nenedi?’

Gideon bing’eyo nenedi nia Yehova ung’iye? Epedho adila urombo woko man ekwayu Yehova kumae: ‘Kan urwo kugweno abinwang’u nia thoi ujomo adila maeni kende ma ke ng’ete ceke thwo kaw, e abing’eyo nia ibemito abodh Israel.’ Urwonde kugweno, thoi ujomo adilane ceke, ento ng’om uthwo kaw i ng’ete! Re Gideon ukwayu Yehova kendo nia urwonde eketh thoi ung’ier i ng’et adila ceke, ento adilane ubed m’uthwo. Kinde ma lembe maeno de ugam utimere, e Gideon uyio nia andha Yehova ung’iye. Ecoko askari pare pi nikiedo ku Jumidian.

 Yehova uyero ni Gideon kumae: ‘Abiketho nyithindho mir Israel biloyo. Ento calu ma juaskari gitie dupa, saa moko wucopo paru nia wuloyo lwiny ku tego mwu giwu. Wac ni juaskari nia ng’atu ma lworo ubenege udok i pacu.’ E juaskari 22 000 gidok. Juaskari 10 000 re m’udong’. Yehova uyero kendo kumae: ‘Fodi asu wend askari tie lee. Lor kugi i dhu kulo, man keth gimadh pii. Ju ma gibimadhu pii ma giwotho neno ka nyo adui ubebino re m’ibicidho kugi i lwiny.’ Dhanu 300 re m’uwok umadhu pii ma gibewotho neno ka nyo adui ubebino. Yehova ung’olo nia dhanu ma nok eno biloyo juaskari 135 000 mi Jumidian.

Cing’ nica kud uthieno, Yehova uyero ni Gideon kumae: ‘Saa mi kiedo i dhu Jumidian uromo, wucidh i kumgi!’ Gideon umio agwara i cing’ dhanu pare man cupa ma dongo ma gicwinyo mac gikanu i ie. Eyero igi kumae: ‘Wunena man wutim calu m’atimo.’ Gideon ukudho agwara pare, eng’enyo cupa m’emaku i cinge, eting’o mac malu, man ekok kumae: “Palamularu pa Yehova man pa Gideon.” Juaskari 300 ceke gitimo kumeno. Ndiri ugam umaku Jumidian man gikwong’o ringo swa. Ndiri ma lee m’umakugi uketho gicaku negiri i kindgi. I saa maeni de Yehova ukonyo Juisrael niloyo judegi migi.