Nyithindho mir Israel giweko Yehova kendo man giworo mungu m’araga. Kinde ma Juamoni gisendo nyithindho mir Israel man gikiedo i dhoggi, mungu m’araga ma gibino woro ukonyogi ngo nyanok de. Nyithindho mir Israel gineno can pi oro ma dupa. E i ng’eye, gikwayu Yehova kumae: ‘Wadubo iri. Ento wakweyi, bodhwa kud i cing judegi mwa.’ Juisrael gigam ginyotho ayi gin m’acwia migi man gicaku woro Yehova kendo. Yehova umaru ngo nia gimediri nineno can.

Juisrael ging’io Yeftha m’ubino ng’atu ma tek re m’utel wigi i lwiny ma gibecikiedo i dhu Juamoni. Yeftha uyero ni Yehova kumae: ‘Kan iketho waloyo lwiny maeni, ang’olo iri nia kinde m’abidwogo, ng’atu ma kwong’a ma biwok kud i ot para pi  nijola, abimie iri.’ Yehova uwinjo rwo pa Yeftha man eketho eloyo lwiny.

Kinde ma Yeftha udwogo i pacu, ng’atu ma kwong’a m’uwok pi nijole ubino nyaku pare m’acel kulong’. Ewok m’ebemiel man ebepadu vul. Yeftha utimo ang’o? Epoi i kum lembang’ola pare man ewacu kumae: ‘Kayo, nyara! Inyayu can lee i ia. Atimo lembang’ola moko ni Yehova. Pi nipong’o lembang’olane, acikara niori icitim i hema pare i Cilo.’ Ento nyaku pare uyero ire kumae: ‘Baba, kan itimo lembang’ola ni Yehova, kwayu ipong’e. Akweyi wek acidh atim dwi ario iwi got karacelo kud anyira wada, e i ng’eye abicidho.’ Nyaku pa Yeftha utimo ni Yehova cuu mandha i hema pi dong kwo pare zoo. Kubang’ oro, nyir wadi gibed gicidh giliewe i Cilo.