Jaisrael moko ma nyinge Elkana ugamu mon ario: acel nyinge bino Hana, ma kucelo ke Penina; emaru Hana nisagu Penina. Penina unyolo awiya dupa ento Hana ubino mbe kud awiya, eno uketho Penina ubed unyware saa ceke. Kubang’ oro, Elkana ubed ucidho ku juruot pare zoo pi niworo Mungu i hema mi cokiri i Cilo. Nindo acel saa ma gini kuca, Elkana uneno Hana ma nyaramara pare utie ku can ma lee. E ewacu ire kumae: ‘Kud iwaki Hana. An a won ot peri anuti. Ameri.’

I ng’eye, Hana ucidho ang’et nyanok pi nirwo. Ekwayu Yehova ku piwang’e nia ekonye. Eng’olo ni Yehova kumae: ‘Yehova, kan imio ira nyathin ma nico, abimie iri, man ebitimo iri i kwo pare zoo.’

Eli ma Jalam ma dit uneno Hana ubewak ling’ ling’, e eparu nia emer ku kong’o. Hana uyero ire kumae: ‘Ungo rwoth para, amer ungo. Atie ku lembe moko ma lee m’ubesendo wiya, man abekoro lembene ni Yehova.’ Eli unwang’u nia eweco swa, man eyero ni Hana kumae: ‘Dong’ Mungu umii iri gin m’ibemito.’ E cwiny Hana ukwio man edok i pacu. Oro acel de ngo i ng’eye, Hana unyolo nyathin ma nico, man ecaku nyinge Samwel. M’umbe jiji, anyong’a unego Hana lee dit.

 Wi Hana uwil ungo i kum lembang’ola m’etimo ni Yehova. Kinde m’ekwiro Samwel ku cak ci, etere i hema mi cokiri kara etim ni Mungu kuca. Hana uyero ni Eli kumae: ‘Eni tie nyathin m’agam arwo pire ca. Amie kara etim ni Yehova i kwo pare zoo.’ Elkana giku Hana gibed giliewo Samwel kubang’ oro, man gibed gitero ire kanzu ma bote mbe. I ng’eye, Yehova udok umio awiya mange ma co adek ku ma nyir ario ni Hana.