PONJI MI 31
Yocuwa ku Jugibeon
Thek ma dupa mi Kanan giwinjo kite ma Juisrael gigam ginyotho ko adhura mi Yeriko. Jubim mi Kanan gipangu nicokiri karacelo pi nikiedo i dhu nyithindho mir Israel. Ento Jugibeon gipangu nitimo lembe m’ukoc. Gikendo bongu m’uyec man gibino i bang’ Yocuwa, giwacu ire kumae: ‘Waai i ng’om ma bor. Wawinjo pi Yehova man pi gin ceke m’etimo iwu i Misiri man i Moab. Wung’ol iwa nia wubitimowa rac ungo man wabidoko jutic mwu.’
Yocuwa uyio lembe ma giyero, man eng’olo igi nia ebitimogi rac ungo. Nindo adek i ng’eye, Yocuwa uwinjo nia karaman Jugibeon giai ungo i ng’om ma bor. Giai i Kanan. Yocuwa upenjogi kumae: ‘Pirang’o wuwondowa?’ Gidwoko kumae: ‘Lworo bino negowa en! Wang’eyo nia Yehova Mungu mwu ubekiedo piwu. Timba kud wunegwa anega.’ E Yocuwa unegogi ngo calu m’eng’olo.
I ng’ei nindo ma nok, jubim abic mi Kanan kud udul mony migi gicokiri nikiedo i dhu Jugibeon. Yocuwa ku basuda pare giwotho diewor traka pi nicibodho Jugibeon. Urwonde apoka, gicaku kiedo lwiny. Jukanan gicaku ringo swa. Ento kaka moko ci ma giringo i ie, Yehova ubolo lungu pei ma dongo i wigi. I ng’eye, Yocuwa ukwayu Yehova uketh ceng’ ucungi. Pirang’o Yocuwa ukwayu nia ceng’ ucungi ma ke nwang’u i wang’e fodi ceng’ ucungo ngo e? Pilembe egeno Yehova. E ceng’ umwony ungo nitundo Juisrael giloyo jubim mi Kanan man udul mony migi pet.
“Wek wec mu bed kumae, Eyo, eyo; Ungo, ungo; man gin m’usagu maeni nwang’u en e pa ng’atu ma rac.”—Matayo 5:37