Kinde ma Saul utho Daudi udoko ubimo. Oro pare ubino 30. I ng’ei m’ecamu ker pi oro moko, etimo lembe ma rac mandha. Uthieno moko, saa m’ebino wotho i the ot pare ma yo malu, eneno dhaku moko ma leng’ ubejom. Daudi umito eng’ei dhakune cuu. E junyutho ire nia nying’ dhakune utie Bath-ceba man won ot pare ke utie jasuda; nyinge Uria. Daudi uketho jukelo Bath-ceba i bang’e. Ewok etimo ribiri ku Bath-ceba man Bath-ceba ugam unwang’u mugisa. Daudi ukeukanu dubo m’etimo. Ewacu nia jadit mi basuda pare uketh Uria kaka ma lwiny ubogere i ie man giweke kende. E junego Uria i lwiny, man Daudi ugamu Bath-ceba ire ni dhaku.

Ento Yehova uneno lembe ma reco ceke ma Daudi utimo. Yehova timo ang’o? Eoro jabila Nathan i bang’ Daudi. Nathan umaku lapor moko kumae: ‘Jalonyo moko ubino ku rombe dupa. Jacan moko ke ubino ndhu kud urombo acel ma nyanok, man emare lee akeca. Ento jalonyo ucidh umayu urombo pa jacan ma nying acel.’ Kwinyo umaku Daudi man ewacu kumae: ‘Jalonyo maeno uromo ku tho!’ Nathan uyero ni Daudi kumae: ‘Jalonyo maeno utie tap in!’ E can umondo i adunde Daudi man eyio kosa pare; ewacu ni Nathan kumae: ‘Adubo ni Yehova.’ Dubo maeno uketho Daudi ku juruot pare ginwang’iri ku peko dupa. Yehova umio matira ni Daudi ento eweko Daudi umedere asu nikwo pilembe ejwigere man eyio dubo pare.

I ng’eye, Daudi umito egier hekalu ni Yehova, ento Yehova uyero ni Daudi nia wode ma Suleman re ma bigiero ire hekalu. E  Daudi ucaku coko dhu jamtic ceke ni Suleman man eyero yor i ie kumae: ‘Ukwayu hekalu pa Yehova ubed leng’ lee. Suleman ma woda ke fodi tie nyathin; abikonye ku coko dhu jamtic m’ebitio ko.’ Daudi uwodho sente pare ma lee kara ukony tic mi giedone. Esayu bafundi ma beco mi giedo. Ecoko dhu mola ma tar ku ma kwar man eketho jukelo yen musonge kud i ng’om mi Turo man Sidon. Kinde ma Daudi dhingo tho, enyutho ayi ma Suleman bigiero ko hekalu. Ewacu ire kumae: ‘Yehova uketho akiewo ayi mi giedo maeni iri. Yehova bikonyi. Lworo kud unegi. Bed tek man tim tic.’