Yehova uyero ni Samwel kumae: ‘Cidh i pacu pa Yese. Kud i kind awiya pare ma co, ng’atu acel bidoko ubimo mir Israel.’ Samwel ugam ucidho i pacu pa Yese. Kinde m’eneno wod Yese ma kayu, eparu yor i ie kumae: ‘Jalawobine copo bedo eni.’ Ento Yehova uyero ni Samwel nia tie en ungo. Yehova wacu kumae: ‘An aneno gin ma ni adunde ng’atini, ento aneno ngo yo woko kende.’

Yese ukelo awiya pare mange ma co abusiel. Ento Samwel uwacu kumae: ‘Yehova ung’io ngo ng’atu acel de m’i kindgi. Awiya peri mange ma co umbe?’ Yese udwoko kumae: ‘Edong’ woda ma cogo ma nyinge Daudi. Ebekwayu rombe para.’ Saa ma Daudi utundo, Yehova uyero ni Samwel kumae: ‘Eni eno!’ Samwel ugam ukonjo mo iwi Daudi pi niwire kara edok ubimo iwi Israel.

Nindo moko i ng’eye, nyithindho mir Israel gicidho nikiedo lwiny i dhu Jufilisti. Jasuda moko ma jarukara ubino i thenge mi Jufilisti; nyinge bino Goliath. Nja kubang’ nindo, ebed ecayu Juisrael, nwang’u ebekok kumae: ‘Wuor ng’atu acel m’i kindwu ubin wakied kude. Kan eloyo, wabibedo jutic mwu. Kan aloyo ke wubibedo jutic mwa.’

Daudi ukelo cam ni umego pare ma gibino kaka ma basuda mir Israel gigonjo i ie. Saa m’etundo, ewinjo wec pa Goliath, man eyero kumae: ‘Abikiedo i dhoge!’ Ubimo Saul uwacu kumae: ‘In fodi itie nyathin.’ Daudi udwoko ni ubimo kumae: ‘Yehova bikonya.’

 Saul uronyo jamlwiny pare i kum Daudi, ento Daudi uyero kumae: ‘Acopo kiedo ngo ku jamlwiny maeni i kuma.’ Daudi uting’o lacur pare, eloro i kulo. Ewok eng’io kidi abic ma kumgi foth man ekethogi i usau pare. E Daudi uringo yor i bang’ Goliath. Goliath ukok kumae: ‘Nyathi jal, kadh i bang’a kwe. Abimio ring’kumi ni winyo mi polo man ni yedi mi lum.’ Wec maeno unyayu ngo lworo i Daudi. En de ekok kumae: ‘Ibebino i bang’a ku palamularu man ku tong’, ento an abino i beng’i ku nying’ Yehova. Ibino kiedo lwiny i dhoggwa ngo, ento i dhu Mungu. Dhanu ceke ma gini keni gibineno nia Yehova utie ku tego nisagu palamularu man tong’. Yehova bimiowu i cingwa.’

Yehova ukonyo Daudi. Daudi uketho kidi i lacur, man eng’ure ku kero pare zoo. Kidine ucidh umaku terwang’ Goliath. E Goliath upodho bir. Jufilisti gigam giringo pi nibodho kwo migi. Nyo in de igeno Yehova calu Daudi?