I ng’ei ma Daudi unego Goliath, ubimo Saul ukethe ni jadit mi basuda pare. Daudi uloyo lwiny dupa; pire ugam uyik lee. Kinde ma Daudi giloko kud i lwiny, jumamon ubed ujologi ku miel, nwang’u gibewer kumae: ‘Saul unego elufu acel, Daudi ke unego elufu apar!’ Kumira ucaku nego Saul i kum Daudi, man emito enege.

Daudi ubino jabodho mi goyo adungu. Nindo acel, kinde ma Daudi ubegoyo adungu ni ubimo Saul, Saul ucobe vii ku tong’. E tong’ne ukadhu i kor ot. I ng’eye, Saul upimo wang’ dupa ninego Daudi. Saa ma Daudi uneno kumeno, egam eringo man ecidh epondo i langa.

Saul ucoko basuda 3 000 man gicidho nisayu kaka Daudi. Giwok gimondo i odicana kaka ma Daudi upondo i ie karacelo ku dhanu m’ewotho kugi. Dhanu  pa Daudi giwacu kumae: ‘Saa mi nego Saul uforomo iri eni, kud iweke!’ Daudi ukwalu tiende nya yo yo, ecidh ethumo dhu bongu pa Saul. Saul unyang’ ungo. I ng’eye, cwiny Daudi upido pilembe enwang’u nia ekoso woro ni ubimo ma Yehova ung’io. Eyio ngo dhanu pare gineg Saul. Kinde ma Saul uwok kud i odicana, Daudi ulwong’o toke man ewacu ire kumae: ‘Ineno, nwang’u anegi tin.’ Re Saul umedere asu nisayu kaka Daudi kara enege.

Diewor moko, Daudi gikud Abicai ma wonyamin gicidh gimondo kaka ma Saul ku basuda pare gigonjo i ie. Giwok ginwang’u Abner m’ubino kuro kum Saul de unindo. Abicai uwacu ni Daudi kumae: ‘Eni e, wek anege cen!’ Daud udwoko ire kumae: ‘Yehova re ma biculo wang’ lembe ma Saul ubetimo. Wating’ tong’ pare ku cupa pare mi pii re ma wacidh ko.’

Daudi ugam uidho iwi got moko ceng’ini keca, kaka m’ecopo neno i ie kagonjo ma Saul gini ie. Ekok kumae: ‘Abner, pirang’o igwoko ngo ubimo peri? Tong’ pa Saul ku cupa pare mi pii ni kani?’ Saul ung’io dwand Daudi, e ewacu ire kumae: ‘Nwang’u icopo nega anega zoo, re iweka. Ang’eyo nia in re m’ibibedo ubimo mir Israel kakara.’ Saul ugam udok i pacu pare. Ento ng’atu moko ubino nuti i ot pa Saul m’udagu ngo Daudi.