Yehova umio rieko ma lee ni Suleman man emio ire bende rwom mi giero hekalu. Ento nok nok Suleman uweko Yehova. Kan itie janyodo, kor cuu ni nyathin peri kite ma ju ma gibed gitimo thier ni mungu m’araga giketho ko Suleman uweko Yehova. Kor ire bende kite ma ker ugam upokere ko, kite ma jubim ma reco giketho ko dhanu uweko Yehova man gicaku woro mungu m’araga. I kind saa maeno, jusendo jubila pa Yehova ma dupa man junego jumoko anega de. Yezebel m’ubino dhaku p’ubimo uketho dhanu dupa mi ker ma yo malu gicaku woro mungu m’araga. I saa maeno, lembe bino rac magwei i Israel. Ento jutic pa Yehova ma gigwoko bedoleng’ migi gibino dupa i Israel; jumoko m’i kindgi ubino ubimo Yehocafat man jabila Eliya.