Ubimo Ahab ubed ukwo i adhura mi Yezrel. Niai kud i wang’ madiriza mi ot pare, ebed eneno podho mir ulok pa ng’atu moko ma nyinge Naboth. Ahab ubed umito nia podho maeno ubed pare, pieno eyenyo eng’iew podhone i bang’ Naboth. Ento Naboth ukwero nilworo ire podho maeno, pilembe Cik pa Yehova ukwero nilworo ng’om ma junyodo uweko ni awiya. Nyo, Ahab uwinjo dwand Naboth pilembe ebino timo lembe m’atira? Ungo. Lembe ma Naboth utimo unyayu ng’ecwiny lee i ie. Ng’ecwinyne uketho ecidh ecerere i kusika pare man ekwero nicamu kadok cam de.

Yezebel ma dhaku pa Ahab, uyero ire kumae: ‘Itie ubimo mir Israel. Icopo bedo ku gin moko ci m’imaru, abimio iri podho maeca.’ Egam ekiewo waraga ni judongo mir adhura, ewacu igi nia gidot Naboth nia ekwong’o Mungu, e ging’ure ku kidi nitundo etho. Judongone gigam gitimo lembe ma Yezebel ung’olo igi; e i ng’eye Yezebel uyero ni Ahab kumae: ‘Naboth udaru tho. Kawoni dong’ podho mir ulok pare tie peri.’

Naboth ubino acel m’i kind dhanu dupa m’ukoso ngo ma Yezebel unego. Enego bende dhanu ma pol m’umaru Yehova. Ebed erwo ni ayi gin m’acwia man ebed etimo lembe mange bende dupa ma reco. Yehova uneno lembe ceke ma reco ma Yezebel utimo. Egam etimo ang’o?

I ng’ei ma Ahab utho, Yoram ma wode re m’udoko ubimo. Yehova uoro ng’atu moko ma nyinge Yehu ucidh umii matira ni Yezebel man ni juruot pare.

Yehu uidho wi kana pare man ecidho nitundo i Yezreel kaka ma Yezebel ubino kwo i ie. Yoram ubino ku wi magali pare pi nirombo ku Yehu man epenje kumae: ‘Nyo kwiocwiny unuti de i kindwa?’ Yehu udwoko ire kumae: ‘Kwiocwiny umbe i  kindwa, pilembe meru ma Yezebel ubemedere asu ku timo lembe ma reco.’ Yoram ugam uwiro wi kana pare kara eringi cen. Ento kinde m’eberingo Yehu ukile kud athero, e etho.

I ng’eye, Yehu ucidho i kal kaka ma Yezebel ni ie. Saa ma Yezebel uwinjo nia Yehu ubebino, erukere, eyiko yuk wiye man ebino kure ku wang’ madiriza mi ot ma malu. Kinde ma Yehu utuc, Yezebel uweco i bang’e ku dhoge ma rac mandha. Yehu ukok ni jutic pa Yezebel ma gibedo i ng’ete kumae: ‘Wubole piny!’ Gibolo Yezebel ku wang’ madiriza, e epodho i ng’om man etho.

Yehu udok unego bende awiya ma co 70 pa Ahab, man ekabu thier ma jubed jutimo ni Bal kud i ng’ombe ceke. M’umbe jiji, ponji maeni ukonyi ninyang’ nia Yehova ung’eyo lembe ceke man nia emio matira ni ju ma gibetimo lembe ma reco tap i saane.