I kind nindo ceke ma Suleman uworo Yehova, Juisrael gikwo ku kwiocwiny. Ento i ng’eye, Suleman ugamu mon dupa mi ng’om mange, man mon ne ceke gibed giworo ayi gin m’acwia. Nok nok, mon maeno giloko adunde Suleman, man en de ecaku woro ayi gin m’acwia. Lembene uton lee i Yehova, uketho ewacu ni Suleman kumae: ‘Abimayu ker kud i ot peri, man abipoko ie ni ario. Abimio ng’et kerne ma lee ni ng’atu acel m’i kind jutic peri, man dhanu mi ot peri ke gibibimo wi ng’et kerne ma nok kende.’

Yehova unyutho lembe maeno m’eyero i ayi mange bende. Nindo moko, kinde ma Yeroboam ma jatic pa Suleman ubewotho i yo, ewok erombo ku jabila Ahija. Ahija uting’o bongu pare man ekilo ie uwok apar ario man ewacu ni Yeroboam kumae: ‘Yehova bimayu ker mir Israel cen kud i cing Suleman, man ebipoko ie ni ario. Gam theng bongu apar ma e, pilembe in re m’ibidoko ubimo iwi suru apar.’ Kinde m’ubimo Suleman uwinjo lembe maeno, emito eneg Yeroboam cen! Yeroboam ugam uringo i Misiri. Oro moko i ng’eye, Suleman utho man wode ma Rehoboam udoko ubimo kakare. E Yeroboam udok i ng’om mir Israel.

 Judongo mir Israel giyero ni Rehoboam kumae: ‘Kan ibitimo bero ni udul dhanu, e gibimeri.’ Ento awobi wadi Rehoboam ma gitie jurimbe giwacu ire kumae: ‘Sendgi lee! Keth gitim tic ma tek!’ Rehoboam utimo lembe ma jurimbe uyero. Ecaku sendo dhanu lee, e gijai ire. Dhanu mi suru apar giketho Yeroboam ni ubimo igi; julwong’o suru aparne nia ker mir Israel. Ento dhanu mi suru ario gimediri nilubo tok Rehoboam; julwong’o suru arione nia ker mi Yuda. Kumeno re ma i suru 12 mir Israel ugam upokere.

Yeroboam ukwero nia dhanu m’ebebimo wigi kud gicidh gitim thier i adhura mi Yerusalem, pilembe adhurane bino i thenge ma Rehoboam ubebimo wie en. Nyo, ing’eyo nia pirang’o Yeroboam ukwero? Pilembe eparu nia udul dhanu gibiweke man gibidok i bang’ Rehoboam. E Yeroboam uyiko dhieng’ ario mi mola ma kwar man ewacu ni dhanu kumae: ‘Wubed wutim thier kakeni. Yerusalem ni bor dit.’ Dhanu gicaku woro dhieng’ mi mola ma kwar, man giweko nitimo ni Yehova.