PONJI MI 50
Yehova ugwoko Yehocafat
Yehocafat m’ubimo mi Yuda, unyotho pemblam pa Bal man ayi gin m’acwia ceke kud i ng’om Yuda. Ebino yenyo nia dhanu ung’ei cik pa Yehova. Pieno, eoro judongomawijo ku Julawi giponj dhanu mi Yuda ceke ku cik pa Yehova.
Lworo umondo i thek ceke m’utwodo nyithindho mi Yuda nikiedo lwiny i dhoggi, pilembe ging’eyo nia Yehova ni karacelo kugi. Gibed gitero kadok giramia ni ubimo Yehocafat. Ento nindo moko, nyithindho mi Moab, mir Amon, man dhanu m’uai i ng’om mi Seir gibino nikiedo lwiny i dhu nyithindho mi Yuda. Yehocafat ung’eyo nia etie ku yeny mi kony pa Yehova. Egam ecoko dhu jumaco, jumamon man awiya ceke karacelo i Yerusalem. Ecungo i wang’gi man ekwayu Yehova kumae: ‘Yehova, m’umbe in, wacopo loyo ngo lwiny maeni. Ka copere, nyuth iwa lembe ma waromo timo.’
Yehova ugam udwoko wang’ rwo pare kumae: ‘Lworo kud unegwu. Abikonyowu. Wucung kakewu, wucung ling’ man wunen ayi m’abibodho kowu.’ Yehova ugam ubodhogi nenedi?
Urwonde kugweno, Yehocafat ung’io juruwer moko man eyero igi nia giwoth i wang’ juaskari. Giwotho niai i Yerusalem nitundo i Tekoa kaka ma gibikiedo i ie lwiny.
Kinde ma juruwer maeno gibewer ku dwandgi ma tek pi nipaku Yehova, e Yehova ukiedo pi dhanu pare: Ejebo wi nyithindho mir Amon ku mi Moab. Pieno, gicaku negiri i kindgi man ng’atu moko acel de mbe m’uboth i kindgi. Ento Yehova ubodho nyithindho mi Yuda, juaskari, man julam. Thek ceke mi ng’om m’utwodo Yuda giwinjo lembe ma Yehova utimo, e ginyang’ nia Yehova ubemedere asu nigwoko dhanu pare. Yehova bebodho jutic pare i ayi ma nenedi? Ebodhogi i ayi ma tung’ tung’. Re pi nibodhogi, embe ku yeny mi kony pa dhanu.
“Can kiedo i lwiny maeni binegowu ngo: wuriei giwu, wucung ling’, man wunen both pa Yehova ma ni kudwu.”—2 Lemkei 20:17