I Nineve ma tie adhura mir Acur, dhanu ubed utimo lembe ma reco. Yehova uoro Yona ma jabila pare ucidh unyuth ni dhanu mi Nineve nia giwek kura man timo migi ma reco. Re Yona uringo bor kaka mange, emondo i yei m’ubecidho i Tarcic.

Kinde ma giwok iwi nam, yamu ma tek utuk i wigi man lworo umaku junam ceke m’ubino i yei. Gikwayu mungu migi m’araga man giyero kumae: ‘Pirang’o lembe maeni uwok i wiwa?’ E Yona uwacu igi kumae: ‘Tie kosa para. Aberingo pilembe amito ngo atim lembe ma Yehova uora nitimo. Wubola i nam, e yamu maeni bicungo iwu.’ Junam gimito ngo gibol Yona i pii, ento ererogi nia gibole. Kinde ma gibole i nam, yamu ugam ucungo.

Yona uparu nia ebecitho. Kinde m’ebemwony i the nam, ecaku rwo i bang’ Yehova. E Yehova uoro rec moko ma dit ubin umwonye, ento kadok rec umwonyo Yona de, re etho ngo. Kud i cindi rec, Yona ukwayu Mungu, eyero ire kumae: ‘Ang’olo nia abiwori nja.’ Yehova ugwoko Yona i cindi rec pi ceng’ adek man i ng’eye eketho recne ucidh ung’oge iwi ng’om m’uthwo.

I ng’ei ma Yehova ubodho Yona, nyo dong’ ecikere ngo nicidho i adhura mi Nineve? Ungo. Yehova uyero kendo ni Yona nia ecidhi kuca. I saa maeni Yona ugam uworo dwande. Ecidho i Nineve man etwong’o dhanu ma timo migi reco mir adhura  maeno kumae: ‘I ng’ei nindo 40, jubirwombo Nineve.’ E lembe moko mi zungo ugam utimere: dhanu mir adhura mi Nineve giwinjo atwong’a maeno man giloko timo migi ma reco. Ubimo mi Nineve uyero ni dhanu pare kumae: ‘Wukwai Mungu ma tek man wulokuru kud i yo mwu ma rac. Saa moko nyo Mungu binegowa ngo.’ Kinde ma Yehova uneno nia dhanu mir adhura mi Nineve giloko timo migi, enyotho ngo adhurane.

Ng’ecwiny umaku Yona pilembe Mungu unyotho ngo adhura mi Nineve. Kepar nyanok: Yehova unyutho cirocir man kisa ma yawe mbe ni Yona, re Yona ubino mbe ku kisa i kum dhanu mi Nineve. Ento ewok kud i adhura man ecidh ebedo i the tipo bombo ma lembe ubeton i ie. I ng’eye, bombone uthwo, e ng’ecwiny uopo i Yona dong’ magwei. Yehova ugam uyero ire kumae: ‘Idieng’ pi bombo maeni nisagu pi dhanu mi Nineve. Giboth pilembe atimo igi kisa.’ Yehova umito mio ire ponji ma kani? Pi dhanu mi Nineve ubino tek nisagu yen moko ci.