Juacur ugam umaku ker mi suru apar mir Israel. Re kawoni Senakerib m’ubimo mir Acur ubemito emak bende ker mi suru ario mi Yuda. Ekwong’o maku adhura mi Yuda acel acel. Ento adhura m’ebino yenyo dit nia emaki ubino Yerusalem. Re wii Senakerib uwil nia Yehova ubegwoko Yerusalem.

Hezekia m’ubimo mi Yuda umio sente ma lee ni Senakerib kara kud enyoth adhura mi Yerusalem. Kadok nwang’u Senakerib ugamu sente p’ubimo mi Yuda de, re asu eoro juaskari pare ucidh ukied lwiny i kum Yerusalem. Ndiri ung’oi i dhanu mir adhura mi Yerusalem, pilembe Juacur gibemediri nicoro ceng’ini mandha. E Hezekia uyero ni dhanu kumae: ‘Lworo kud unegwu. Juacur gitek, ento Yehova biketho wabidoko tek nisagugi.’

Senakerib uoro Rabcake i adhura mi Yerusalem kara ecidh epik lworo i dhanu. Kinde ma Rabcake utundo kuca, ewok ecungo i dhugang’ mir adhura man ekok kumae: ‘Yehova copo konyowu ngo. Kud wuwek Hezekia uwondwu; mungu moko mbe ma romo bodhowu kud i cingwa.’

Hezekia ukwayu Yehova unyuth ire gin m’ecopo timo. Yehova udwoko ire kumae: ‘Lembe ma Rabcake uyero kud unyai lworo i ii. Senakerib bimaku ngo adhura mi Yerusalem.’ I ng’eye, Senakerib uoro waraga moko ni Hezekia. Ekiewo i waragane kumae: ‘Miyiri ira. Yehova copo bodhi ngo.’ Hezekia urwo i bang’ Yehova kumae: ‘Wakwei, Yehova, bodhwa, kara dhanu mi ng’om ceke ging’ei nia in i kendi m’itie Mungu mandha.’ Yehova udwoko ire kumae: ‘Ubimo mir Acur bimondo ngo i Yerusalem. Abigwoko adhura para.’

Senakerib ubino ugeno nia i ng’ei nindo ma nok kende ci, ebimaku adhura mi Yerusalem. Ento i diewor acel, Yehova uoro malaika pare acel kaka ma Juacur gigonjo i ie i ng’ei adhura. E malaikane unego  juaskari 185 000! Juaskari ma tek p’ubimo Senakerib githo pet. E calu dong’ gin ma Senakerib romo timo mbe, edok i pacu pare ma wie thum. Yehova ugwoko Hezekia man adhura mi Yerusalem tap calu m’elar eng’olo. Ka nwang’u in de ibino i adhura mi Yerusalem, nyo nwang’u iromo ketho genogen peri iwi Yehova?