Yosia udoko ubimo mi Yuda kinde m’ebino ku oro abora. I saa maeno, dhanu umondo i timo mir ajoga man gibed giworo ayi gin m’acwia. Kinde ma Yosia udoko ku oro 16, ecaku ponjo ning’eyo ayi m’atira m’ecopo woro ko Yehova. Saa m’edoko ku oro 20, ecaku nyotho ayi gin m’acwia man pemblam mi mungu m’araga ceke kud i ng’om Yuda. Man kinde m’edoko ku oro 26, emaku yub kara juyik hekalu pa Yehova.

Hilkia ma Jalam ma dit unwang’u kitabu moko m’adola mi Cik pa Yehova i hekalu, copere kitabune ubino ma Musa ugam ugoro en. E Cafan ma jagor p’ubimo ukelo kitabu m’adolane i bang’ Yosia man ecaku somo ire Cik m’i ie ku dwande ma tek. Kinde ma Yosia uwinjo lembe mi Cikne, enyang’ nia dhanu udaru weko niworo Cik pa Yehova pi oro ma dupa. Ubimo Yosia uyero ni Hilkia kumae: ‘Yehova tie ku ng’ecwiny lee i kumwa. Wucidh wupenje kara enyuth iwa gin ma wacikara nitimo.’ Nikadhu kud i bang’ jabila moko ma dhaku ma nyinge Hulda, Yehova udwoko ire kumae: ‘Dhanu mi Yuda giweka. Abimio igi matira, ento abimie ngo i saa mi bimobim pa Yosia, pilembe ejwigere.’

Kinde m’ubimo Yosia uwinjo lembe maeno, ecidho i hekalu man ecoko dhu dhanu mi Yuda karacelo. E esomo Cik pa Yehova ku dwande ma tek ni dhanu mi Yuda. Yosia man dhanu ceke ging’olo nia gibiworo Yehova kud adundegi zoo.

 Nwang’u dong’ pi oro ma dupa, dhanu mi Yuda gitimo ngo Kadhukuwijo. Ento kinde ma Yosia usomo i kitabu mi Cik nia jucikiri nitimo Kadhukuwijo kubang’ oro, eyero ni dhanu kumae: ‘Wabitimo Kadhukuwijo ni Yehova.’ Yosia ugam uyikere pi nithiero lam ma tung’ tung’ man epangu bende ungu mi juruwer pi niwer i hekalu. E dhanu ugam utimo Kadhukuwijo man i ng’eye, gitimo Foc mi kwen ma thobi mbe i ie pi nindo abiro. Niai i kum jabila Samuel, nwang’u fodi jutimo ngo Kadhukuwijo ma kumeca. Yosia ugam umaru Cik pa Yehova andhandha. Nyo in de ibed imaru niponjo lembe iwi Yehova?