Ingei nyom mi Kana, Yesu ucidho i Kapernaum. En ku min man awiya pagi ma Yakobo, Yosefu, Simon, man Yuda, bende gicidho kuca.

Yesu ucidho nitimo ang’o i Kapernaum? Kapernaum utie adhura ma lee ma pire uyik man ma lac, nikadhu adhura mi Nazareti kunoke mi Kana. Bende julub pa Yesu ma pol ma nyen de gitie dhanu mi Kapernaum kunoke ma ceng’ini ku keca. Pieno Yesu umito ekeponjgi i pacu migi kuca kara giteng’ini.

Yesu utimo tic ma dupa ma wang’u ijo kinde m’ebino i Kapernaum. Pieno, dhanu dupa mir adhura maeno ku mi ng’ete bende, giwinjo pi lembe maeno m’etimo. Ento Yesu ku jurimbe, ma gitie Juyahudi m’atika, gicikiri nicidho i Yerusalem pi nitimo Kadhukuwijo mi oro mi 30 R.M.

Kinde ma gimondo i hekalu i Yerusalem, julub gineno lembe moko ma Yesu utimo m’utelo nen migi, lembene ukoc ku m’elar etimo iwang’e.

Cik pa Mungu ung’olo ni nyithindho mir Israel nia gibed githier lei ni lam m’awang’a i hekalu, man ukwayu welo gibed ku gin ma gibicamu pi nindo ma gibitimo. Pieno Cik uyio ni jum’ubino i Yerusalem, ma giai bor, nia gibed ku sente moko ma gibing’iewo ko “koni dhiang’, rombe,” diegi, man piny mange ma bikonyogi. (Poi mi Cik 14:24-26) Lembuno uketho jukuloka mi Yerusalem ucaku nilworo lei kunoke winyo tap i lela mir hekalu. Jumoko mi kindgi gikwalu dhanu ku bei ma tek ma ging’olo.

Kinde ma Yesu uneno lembuno, kwinyo umake, man edhenyo sente mi jukulokane, eredho meza migi, man eriemogi cen. E ing’eye eyero kumae: “Wuwodh giki maeni woko; kud wudwok ot pa Vwa ni odkuloka.”​—Yohana 2:16.

Kinde ma julub pa Yesu gineno lembe maeno, gipoi ikum lembila m’uweco pi wod Mungu, m’uwacu kumae: “Kum ngiri mi ot peri cama.” Ento Juyahudi upenje kumae: “Giranyutha ang’o m’inyutho iwa kum itimo gin maeni?” Yesu udwoko igi kumae: “Wuyak hekalu maeni, man i ceng’ adek abiting’e malu.”​—Yohana 2:17-19; Zaburi 69:9.

Juyahudi giparu nia nyo Yesu ubeweco pir hekalu mi Yerusalem, uketho gipenje kumae: “Jugomo hekalu maeni rundi pier ang’wen wi abusiel, in e m’ibiting’e malu ceng’ adeki?” (Yohana 2:20) Ento, Yesu ubino niporo kume kud hekalu. Oro adek yo ng’ei wec maeno, saa ma Yesu ucer, ka julubne gidok ginyang’ i lembe maeno.