Kinde ma Yesu ubino i Yerusalem pi nitimo Kadhukuwijo mi oro 30 R.M., etimo giranyutha kunoke udu dupa ma wang’u ijo. Lembuno uketho, dhanu mapol giyie. Lembene unyang’u bende Nikodem ma Jafarisayo m’utie acel m’ikind jupoklembe madit mi ot pido ma malu mi Juyahudi ma julwong’o Sanedrini. Emito enyang’ i lembe dupa, pieno ecidho ibang’ Yesu kud uthieno, pilembe elworo nia ka judong Juyahudi ginene, gibicido nyinge.

Nikodem uwacu ni Yesu kumae: “Japonji, wang’eyo nia in i japonji m’uai ba Mungu: kum ng’atu acel de mbe ma copo timo giranyutha maeni m’itimo, tek Mungu mbe kude.” Yesu uloko ire lembe ewacu nia, kara ng’atini umond i Ker pa Mungu, ng’atune ucikere ‘ninyolere’ kendo.​—Yohana 3:2, 3.

Ka kumeno, dong’ jucopo ninyolo ng’atini kendo nenedi? Nikodem upenjo Yesu kumae: “Ecopo mondo i min wang’ arionde, kan enyole?”​—Yohana 3:4.

Ninyoliri kendo tie kumeno ngo. Yesu ukoro ire kumae: ‘Tek junyolo dhanu ku pi ku tipo de ngo, ecopo mondo i Ker pa Mungu ngo.’ (Yohana 3:5) Yesu unyolere kendo ‘ku pi man ku tipo,’ kinde m’emaku batizo man kinde ma tipo maleng’ uloro iwie. I saa maeno, dwal uai i polo uwacu kumae: “Meni Woda ma jamerna, ma mutoro nega ikume.” (Matayo 3:16, 17) I yo maeno re ma Mungu unyutho nia enyolo Yesu kendo nibedo wode mi tipo, m’etie ku genogen mi mondo i Ker mi polo. Ing’eye, i Pentekoste oro mi 33 R.M., tipo maleng’ uloro iwi ju ma gimaku batizo, man ginyolori kendo nidoko nyithindho mi tipo pa Mungu.​—Tic mi Jukwenda 2:1-4.

Etie tek ni Nikodem ninyang’ i lembe ma Yesu ubeponje ko iwi Ker pa Mungu. Pieno, kara Nikodem unyang’, Yesu ukoro ire lembe dupa iwi rwom masegi m’ebedo ko, m’etie ko Wod Mungu. Eyero kumae: “Man calu yang’ Musa ting’o thwol malu i yamba, e kumeno jubikoting’o Wod dhanu malu be; kara ng’atu ma tek uyio ubed ku kwo ma rondo ku rondo ni kume.”​—Yohana 3:14, 15.

Yang’ con i yamba, ka nyithindho mir Israel moko thwol ma tie ku kwir utong’o, kara gibothi, gineno ba thwol mi mola. (Wel 21:9) Kumeno bende, kara dhanu ceke gibin gibothi man ginwang’ kwo ma rondo rondo, gicikiri ninyutho yioyic migi i Wod Mungu. Pi nikonyo Nikodem unen mer pa Yehova i lembe maeno, Yesu uwacu ire kendo kumae: “Mungu maru ng’om m’umbe, ketho emio Wode kulong’, kara ng’atu matek uyie kud erwiny ki, endre ebed ku kwo ma rondo ku rondo.” (Yohana 3:16) Pieno, ikind dwi ma romo abusiel kumeni ing’ei ma Yesu ucaku tic pare, egam enyutho kamaleng’ i Yerusalem nia andha etie yo mi both ni kodhi dhanu.

Yesu uyero ni Nikodem kumae: “Mungu uoro Wode i ng’om ungo ya upok lembe m’i ng’om.” Eno nyutho nia juore ngo nia ebin epok lembe mi ng’om rac, niwacu ekel pokolembe mi nyoth iwi dhanu ceke. Ento, calu ma Yesune en gire uyero, juore “kara ng’om uboth nikume.”​—Yohana 3:17.

Lworo ketho Nikodem ubino i bang’ Yesu kud uthieno. Pieno etie lembe mi mutoro nineno nia Yesu udaru wec ku Nikodem ku lembe mae: “Maeni de lembapoka, ya der [ma Yesu unyutho nikadhu kud i kwo man ponji pare] ubino i ng’om, man dhanu gimaru mudho masagu der; kum tic migi rac. Kum dhanu ceke kubang’gi ma  gitimo rac gidagu der, gibino de ngo ba der, kara kujujuke kum tic pare. Endre ng’atu m’utimo lemandha bino ba der, kara tic pare nyuthre, nia gitimbri i Mungu.”​—Yohana 3:19-21.

Kawoni dong’ lembe udong’ i cing’ Nikodem ma Jafarisayo ma tie japonji mir Israel, nitimo ku lembe m’ewinjo iwi rwom ma Yesu tie ko i lembakeca pa Mungu.