Ing’ei ma Yesu ku julubne gitimo Kadhukuwijo i oro 30 R.M., giai kud i Yerusalem. Re gidok ungo wang’ acel thugi i Galilaya. Gicidho i Yahudi, kuca giwok gimio batizo ni dhanu dupa. Yohana ma Jababutisi bende ubino timo tic marom eno nwang’u oro ukadhu acel kumeni, man fodi julub pare moko gibino karacelo kude; ecicopere nia gibino i poga ma kulo Yordani ni ie.

Yesu en ku cinge emio ngo batizo ni ng’atu moko; julubne re ma gimio, re i the telowic pare. Niai ma Yesu ucaku tic pare nitundo saa maeno, fodi giku Yohana ceke gibeponjo Juyahudi m’uloko cwinygi pi dubo ma gitimo ikum lembariba mi Cik pa Mungu.​—Tic mi Jukwenda 19:4.

Re kumira unego julub pa Yohana ikum Yesu man gidote ni Yohana giwacu kumae: ‘En [Yesu] ma naka wubedo wukude . . . ebemio batizo, dhanu ceke de gibino i bang’e.’ (Yohana 3:26) Yohana ke kumira ubenege ngo, ento anyong’a re m’ubenege pilembe dhanu dupa ubecidho ibang’ Yesu, man ebemito julub pare de anyong’a uneggi. Epoyo wigi kumae: “Wun giwu wunyutho pira, nia awacu kumae, an a Kristu ngo, ento, ya juora i wang’e.” Ekoro igi lembe ku lapor ma yot ma dhanu ceke copo nyang’ i ie, ewacu kumae: “Ng’atu m’ubedo ku mugole en e cwar mugole: ento jarim cwar mugole, m’ucungo m’uwinje de, anyong’a kwa nege kum dwand cwar mugole: ka kumeno anyong’a maeni timbre kakare.”​—Yohana 3:28, 29.

Calu jarimb cwar mugole, dwi moko yor iwang’e Yohana ubino kud anyong’a ninyutho julubne ni Yesu. Jumoko m’ikindgi gilubo Yesu man ing’eye tipo maleng’ udok uwirogi. Yohana umito bende nia julub pare ma gitie kude saa nica, gidok julub pa Yesu. I andha, ebino niyiko yo ni tic pa Kristu. Ekoro kumae: “Ebikosagre be, ento an abikojwik be.”​—Yohana 3:30.

Yohana mange m’ular ucaku lubo Yesu iwang’e udok ukiewo lembe iwi kaka ma Yesu uai i ie, man iwi lembe madit m’etimo pi nibodho dhanu; ekiewo kumae: “Ng’atu m’uai malu esagu ceke; . . . Wego maru Wod, man emio gin ceke i cinge. Ng’atu m’uyio Wod ebedo ku kwo ma rondo ku rondo; ento ng’atu m’uworo Wod ungo bineno kwo ngo, ento kwinyo pa Mungu ni i wie.” (Yohana 3:31, 35, 36) Eno tie lemandha ma pire tek m’ubekwayu dhanu ceke ung’ei!

Nindo ma nok ing’ei ma Yohana ma Jababutisi uyero nia tic pare bijwik, Herode utwie. Nwang’u Herode ugamu Herodia ma ci umin ma Filipo ni dhaku. Kinde ma Yohana utuco wie kamaleng’ nia eca etimo gier, Herode ubolo Yohana i kol. Saa ma Yesu uwinjo nia jutwio Yohana, eweko Yahudi man eting’o julubne ‘eai ecido i Galilaya’.​—Matayo 4:12; Marko 1:14.