Ing’ei ma Yesu timo nindo 40 i yamba, man iwang’ nidok i Galilaya, ecidho ibang’ Yohana m’umio ire batizo. Kinde ma Yesu wok ceng’ini kude, Yohana unyuthe man ewacu ni dhanu m’utie kude kumae: “Nen, Nyathi Rombo pa Mungu, ma kabu dubo m’i ng’om woko! Maeni en e ng’atu m’ayero pire kumae, Ng’atu m’ubino i ng’eya juketho esaga: kum en e ng’atu ma kwong’a ira.” (Yohana 1:29, 30) Kadok ebino jadit ni Yesu ku dwi moko de, re eng’eyo nia Yesu ular ubedo nuti i polo ku kum mi tipo.

Yenga manok i wang’e, kinde ma Yesu ubino ibang’ Yohana pi nimaku batizo, ubenen ve Yohana ung’eyo ngo nia Yesu utie Masiya. Yohana uyero kumae: “Ang’eye ngo; ento kara enyuthre ni Israel, kum lembe nini abino kumio [batizo] i pi.”​—Yohana 1:31.

Yohana ukoro ni dhanu m’ubewinje, lembe m’eneno kinde m’ebino nimio batizo ni Yesu. Eyero kumae: “Aneno Tipo ai i polo loro piny pamir akuru; ebedo de i wie. Man ang’eye ngo: ento ng’atu m’uora nimio [batizo] i pi, ewacu ira kumae, Ng’atu ma tek ibineno Tipo beloro i wie man ebedo i wie, en e ng’atu m’umio [batizo] i Tipo maleng’. E aneno, man anyutho nia maeni en e Wod Mungu.”​—Yohana 1:32-34.

Ing’ei nindo moko, kinde ma Yohana bino karacelo ku julubne ario, Yesu ubino kendo ibang’e. E Yohana uyero kumae: “Nen, Nyathi Rombo pa Mungu!” (Yohana 1:36) Lembe maeni uketho julub ario pa Yohana ma Jababutisi ulubo tok Yesu. Ng’atu acel nyinge ubino Andrea. Ecicopere nia ng’atu ma kucelo utie ng’atu m’ukiewo lembe maeni ma waweco iwie, ma nyinge bende utie Yohana. Ubenen ve nia Yohana maeni utie umaru Yesu, kum etie wod Salome. Ecibedo ve Salome utie nyamin Maria, nying’ cware utie Zebedayo.

Kinde ma Yesu ulokere, eneno Andrea giku Yohana gibelubo ng’eye, epenjogi kumae: “Wuyenyo ang’o?”

E gipenje kumae: “Rabbi, . . . ibedo kani?”

Yesu yero igi kumae: “Wubin e wubineno.”​—Yohana 1:37-39.

Ikum saa apar mi reto, Andrea ku Yohana gibedo karacelo ku Yesu i dong’ reto maeno ceke. Lembuno umio anyong’a lee mandha i Andrea, uketho kinde m’enwang’u umin ma Simon, ma julwong’e bende ku nyinge ma Petro, eyero ire kumae: ‘Wanwang’u Masiya.’ (Yohana 1:41) E Andrea utero Petro ibang’ Masiya. Lembe mange m’utimere ing’eye unyutho nia Yohana udok unwang’u umin ma Yakobo bende, man ekele bende i bang’ Yesu; re Yohana umedo ngo lembe maeni m’etimo i lembe m’ekiewo.

Urwonde, Yesu udok unwang’u Filipo, m’uai i Bethsaida. Adhura maeno nwang’ere ceng’ini  ku dhunam mi Galilaya man etie adhura pagi Andrea ku Petro. Yesu ulwong’o Filipo kumae: “Luba.”​—Yohana 1:43.

Filipo bende unwang’u Nathanael, ma julwong’e bende ku nyinge ma Bartholomayo, man eyero ire kumae: ‘Wanwang’u ng’atu ma Musa goro pire i cik ku jubila, en e Yesu ma Janazareti, ma wod Yosefu.’ Nathanael ubedo ku jiji man eyero ni Filipo kumae: “Gin moko maber copo ai i Nazareti?”

Filipo uketho cwinye kumae: “Bin inen.” Yesu uneno Nathanael ubebino, e eyero kumae: “Nen, Jaisrael ma abombi mbe i ie.”

Nathanael upenje kumae “Ing’eya nenedi?”

Yesu udwoko ire kumae: “Ma fodi Filipo ku lwong’i ngo m’ini ther ulam ca, nwang’u aneni.”

Nathanael udwoko ire lembe ma ie bewang’ ko kumae: “Japonji, in i Wod Mungu; in i Ubimo mir Israel.”

Yesu upenje kumae: “Kum awacu iri nia aneni ther ulam [ci] iyio? Ibineno giki ma dit ma sagu maeni.” E Yesu ung’olo kumae: “Andhandha, awacu iwu, wubineno polo yabre, man malaika pa Mungu m’ubeidho m’ubeloro de iwi Wod dhanu.”​—Yohana 1:45-51.

Nyanok ing’ei lembe maeno, Yesu karacelo ku julub pare manyen, giai kud i poga mi Yordan man gicidho i Galilaya.