Kara ilub lapor pa Yesu ukwayu ibed . . .
WON KISA
Yesu ubino mbe ku dubo, pieno eremo ngo man enwang’ere ngo ku can mapol ma dhanu bino nwang’iri ko. Re ebed edieng’ lee pi dhanu. Ebino ayika nimiere pigi, cil nitwonere ikum yeny pare ma pigi tek kara epong’ yeny migi. Kisa ubed ucwale nikonyo jumange. Kara inyang’ i lembe maeno cuu, som Wic mi 32, 37, 57, 99.
NG’ATU MA WINJERE KU DHANU CEKE
Dhanu mi oro ceke, aradu ku jum’utii gibed ginwang’u nia gicopo coro ceng’ini i vut Yesu, pilembe ebino nzanza ku dhanu man enwang’u ngo nia pire tek lee nisagu jumange. Calu gibed gineno nia Yesu ubedieng’ pigi, ginwang’iri maber i ng’ete. Kara inyang’ i lembuno, som Wic mi 25, 27, 95.
NG’ATU MA RWO ARERI
Yesu ubed urwo wang’ mapol ibang’ Won kud adundene ceke, saa m’etie kende man bende ku jurutic mange m’ubeworo Mungu i andha. Ebed erwo wang’ mapol: i saa pa cam, pi nidwoko foyofoc ni Won, pi niyunge, man pi nikwayu telowic pare iwang’ maku yub. Ku lapor, kenen Wic mi 24, 34, 91, 122, 123.
NG’ATU MA SAYU BERO MI JUMANGE
I saa ma nwang’u ukwayu Yesu ukeuyom i ie ayoma, emedere asu nisayu yeny mi jumange. Ebino ngo nibesayu kwa iye gire. I lembe maeno bende, eweko lapor m’umaku walubi cuu mandha. Kenen laporne i Wic mir 19, 41, 52.
NG’ATU MA TIE AYIKA NIWEKO KIER
Yesu ujik ungo kende kende niponjo nia jubed juwek kier, ento enyutho lembene ku timo, kinde m’eweko kier mi julubne man mi jumange. Som lapor ma nwang’ere i Wic mi 26, 40, 64, 85, 131.
NG’ATU MA WON AMORA
Lembila ular uewo nia Juyahudi dupa bikwero Masiya man nia judegi pare gibinege. Nwang’u Yesu copo miere ngo nitimo akeca ni dhanu. Ento ecero bang’ thier mandha kud amora. Kumeno re m’eweko lapor maber ni julub pare ceke ma judagugi kunoke ma jubenyayu ragedo i kumgi. Som Wic mir 16, 72, 103.
NG’ATU MA JWIGERE
Ng’eyong’ec man rieko pa Yesu utie lee mandha nikadhu pa dhanu maeni ma gileng’ ungo. Calu m’ebino mbe ku dubo, eno uketho ebino ku tego man rieko m’usagu pa dhanu mange ceke m’ekwo kugi. Bende, ejwigere pi nitimo ni jumange. Ibinwang’u ponji iwi lembe maeno i Wic mir 10, 62, 66, 94, 116.
NG’ATU MA CIRO LEMBE
Yesu ubed unyutho cirolembe saa ceke ni jukwenda pare man ni jumange, ka gibetundo ngo nilubo lapor pare kunoke nitio ku ponji pare. Ebed edwogo saa ceke iwi ponji ma gitie ku yenyne kara gicor ceng’ini ku Yehova. Nen lapor mi cirolembe ma Yesu uweko i Wic mi 74, 98, 118, 135.
