Kadhukuwijo mi oro 32 R.M. uberomo man ikind nindo maeno Yesu ubeponjo i Galilaya. Ing’eye, copere nia ecidho i Yerusalem, calu ma Cik pa Mungu ung’olo. Re Yesu ubedo ku wang’e lee dit pilembe Juyahudi gibemito ginege. (Yohana 7:1) Ing’eye, eloko edok i Galilaya.

Ecicopere nia Yesu ubino i Kapernaum kinde ma jugorcik ku Jufarisayo giai i Yerusalem gibino ibang’e. Gibino ibang’e pirang’o? Gibeyenyo thelembe ma gicopo dote ko nia eturo cik mi dini. Gipenje kumae: “Julubni gikadhu ku wi lembe mi kei mi judongo nedi? Kum gilogo cing’gi ngo ka gicamu kwen.” (Matayo 15:2) I andha, Mungu ukwayu ngo nyanok de nia dhanu pare giwor lembe mi kei ma kumeno, ma nia ‘gilog cing’gi mii’ nitundo i the botgi. (Marko 7:3) Re Jufarisayo ginwang’u nia ka ng’atini utimo ngo kumeno nwang’u etimo lembe marac dit.

Kakare niculo wang’ lembe migi atira tira, Yesu unyutho igi kite ma gibenyotho ko Cik pa Mungu akakaka. Epenjogi kumae: “Wun bende wukadhu ku wi cik pa Mungu nedi kum lembe mi kei mu? Kum Mungu wacu kumae, yung wuru ku meru: man ng’atu m’uyero lembe ma rac kum won kadi min, wek etho athoa. Ento wun re wuwacu kumae, ng’atu ma tek biwacu ni won kadi min kumae, maeno ma nwang’u ande bedo iri ni kuloka ni kuma emire ni Mungu, meca ebiyungo won ungo.”​—Matayo 15:3-6; Ai 20:12; 21:17.

Jufarisayo giloko nia ng’atini copo tio ngo ku sente, jamcinge kunoke gin moko ci ma dong’ edaru koyo segi nia ebimio ni Mungu i hekalu. Re i andha, kadok edaru pangu nia ebitere i hekalu de, re fodi asu etie piny pare. Ku lapor, jalawobi copo yero nia sente kunoke piny pare moko utie “korbani,” niwacu giramia m’ebimio ni Mungu, kunoke m’epangu nia ebitero i hekalu, calu ve dong’ pinyne utie mir hekalu. I andha, fodi asu piny ca utie pare, re ebeloko nia ecopo tio ngo kude pi nikonyo junyodo pare ma giteng’ini. I kite maeno, nen nia ebekwero nitimo lembe m’ecikere nitimo ni junyodo pare.​—Marko 7:11.

Lembe ubeton i Yesu ikum kite ma Jufarisayo ginyotho ko Cik pa Mungu, uketho ewacu igi kumae: “Wuthiro lembe pa Mungu kum lembe mi kei mu. Wu weg ambili, yang’ Isaya ewo piwu dre, m’ewacu ko kumae, ‘Dhanu maeni giyunga ku dendhoggi; ento adundegi tung’ i kuma. Ento girwo i bang’a mananu, ma giponjo ko cik mi dhanu ni ponji migi.’” Jufarisayo gisayu kpe nia gidwok ang’o ni Yesu pi juk ma ngbeng’ m’emio igi. Pieno, elwong’o udul dhanu gikecor ceng’ini ibang’e. E ewacu igi kumae: “Wuwinji, man wung’ei: giki ma mondo i dhok cido i dhanu ngo; ento maeno ma ai kud i dhok e ma cido i dhanu.”​—Matayo 15:6-11; Isaya 29:13.

Ing’eye, kinde ma Yesu gicidho i ot moko, julub gipenje kumae: “Ing’eyo nia Jufarisayo ka giwinjo lembe maeni, gikieri?” Eloko igi kumae: “Ku ba girapidha ceke ma Vwa m’i polo pidho en ungo jubifudhe woko. Wekgi. Gi jutelwidhanu ma gin de gin abinga. Man tek abinga telo wi abinga, gin ario de gibipodho i vur.”​—Matayo 15:12-14.

Petro udok upenjo Yesu nia ekekor igi ku julub mange nia i andha ang’o ma cido i dhanu. Ubenen ve nia Yesu uzungo penji maeno, pieno eyero igi kumae: “Wung’eyo ngo, nia gin ma tek umondo i dhok kadhu i ic, jutere de i odbari? Ento giki ma ai kud i dhok re giai kud i adunde; man gicido i dhanu. Kum pidoic ma rac ai ku i  adunde, ku negonek, ku gier, ku tarwang’, ku kwo, ku cwayu ndra, ku cayucac: maeni e ma giki ma cido i dhanu; ento camu ku cing’ m’aloga ngo re cido i dhanu ngo.”​—Matayo 15:17-20.

Yesu ubemito yero ngo nia dong’ kud jukwan ku leng’o, man nia kud jubed julog cing’jo iwang’ tedo cam kunoke iwang’ camu cam. Ento ebekwero ambili mi judong dini ma gibeloko cik m’atira pa Mungu ku cik mi dhanu. M’umbe jiji, timo mareco ma ai kud i adunde re ma cido i dhanu.