Kinde ma Yesu udwogo kud i Dekapoli, dwogo parene uyik ikind Juyahudi ceke m’ubino nikwo yo malu i dhunam mi Galilaya. Ecicopere nia dhanu dupa giwinjo pi wavuvu ku nam m’ejuko, man dhanu mange ve giwinjo pi pajogi m’ewodho kud i dhanu. Pieno, “udul ma dit gicokri” i dhunam pi nijolo Yesu, ecibedo ve ubino i adhura mi Kapernaum. (Marko 5:21) Kinde ma fodi enyono dhunam nyapok ci, dhanu ceke ubino i bang’e kud ava mi winje man mi neno gin m’ebitimo.

Ng’atu acel m’ikindgi m’ubino nidieng’ nia enen kum Yesu, ubino jadit mi kacokiri, ma nyinge Yairo, ecicopere nia etie dhanu mi Kapernaum. Ebin epodho the tiend Yesu man ekwaye kendo kendo kumae: “Nyathi nyara dhingo tho: akweyi, ya ibin iketh cingi i kume, kara kume kei, ebed kwo de.” (Marko 5:23) Yesu bidwoko nenedi wang’ kwac pa Yairo ma nia ebodh ko nyaku pare m’acel kulong’? Nyakune ubino ku oro 12 man pire ubino tek lee i ie​—Luka 8:42.

Kinde ma Yesu ubecidho i pacu pa Yairo, ewok enwang’ere iwang’ lembe mange. Dhanu dupa ma gibino nilubo toke, gibino niparu nyo saa moko gibineno udu mange m’ebitimo. Ento, dhaku moko kud i kind udul, ubino nidieng’ pare pi remo ma pek m’enwang’ere ko.

Pi oro 12, Nyayahudi maeno ubino nisendere ku remo mi rimo m’ubeoi i kume. Ecidho ibang’ jukeikum mapol, man sente pare de ceke uthum ikum yath ma ging’olo ire nia emaki. Re yathne ukonye ngo. Pieno, twoyo pare ‘udoko rac ma sagu.’​—Marko 5:26.

Kepar, twoyo pare utie ngo twoyo m’ubesende asenda kende, etie bende twoyo mi lewic. Ung’eyere nia kit twoyo ma kumeno jubed juweco pire ngo ngbeng’ iwang’ dhanu. M’umedo maeno, i the Cik pa Musa de, ka dhaku moko rimo ubeoi ikume, ebedo m’ecido. Ka ng’atu moko umulo kume kunoke umulo kum bongu pare ma rimo nikume, ecikere nijom man ebibedo m’ecido cil uthieno.​—Lembe mi Julawi 15:25-27.

Dhaku maeno ‘uwinjo pi Yesu,’ man ebino nisaye. Calu m’ebedo m’ecido, ecidh eridere arida kud ikind udul dhanu nyaling’ ling’, m’ewacu ko yor i ie kumae: “Tek amulo kendi pare ci, e kuma bikei.” Kinde m’emulo dhu bongu pa Yesu ci, ndhu ndhu nica, ewinjo rimo m’ubeoi i kume ucungo! E “kume kei ni tho pare.”​—Marko 5:27-29.

I ng’eye Yesu upenjo kumae: “Ng’a mulo kuma?” Iparu nia dhaku maeno uwinjere nenedi kinde m’ewinjo wec maeno? Petro ugamu dhu Yesu, m’ebekwere ko kumae: “Udul dhanu gicungri i kumi gidii.” Dong’ ke pirang’o Yesu ubepenjo nia, “ng’a mulo kuma?” Yesu udok uyero kumae: “Ng’atu moko mulo kuma; kum ang’eyo nia tego ai i bang’a.” (Luka 8:45, 46) M’umbe jiji, tego m’ukeyo kum dhaku maeno uai i bang’ Yesu.

Kinde ma dhakune unyang’ nia junene, ebin epodho i the tiend Yesu, ma ndiri nege, man ma kume de bemiel. Ekoro i wang’ dhanu ceke pi twoyo m’ubino nisende, man eyio nia andha kume ukei. Ku yoo, Yesu uketho cwinye kumae: “Nyara, yioyic peri e m’ukeyo kumi; ci ma cwinyi kwio, kumi bed leng’ de ni tho peri.”​—Marko 5:34.

Eno ubenyutho kamaleng’ nia, ng’atu maeno ma Mungu ng’io pi nibimo wi ng’om, utie ng’atu maber, ma won kisa, ma bedieng’ ungo adieng’a kende pi dhanu, ento etie bende ku tego mi konyogi!