Yesu ku julubne gibecidho kawoni yo malu i Galilaya. Nindo mi kayu mwoka uromo, man nganu bende udaru bogere i podho. Kec uwok umaku julub, e gijaku jang nganu moko, ging’inyo man gimwodo. Ento nindo maeno tie ceng’ Sabatu, man Jufarisayo gibelubo kilili lembe ma julub gibetimo.

Poi nia nindo moko iwang’e kinde ma Yesu ubino i Yerusalem, Juyahudi moko gimito ginege pilembe gidote nia eturo cik mi Sabatu. Kawoni Jufarisayo gibedoto julub iwi lembe ma gitimo. Giwacu kumae: ‘Nen, julubni gitimo gin ma cik uyio ngo ya jutim i ceng’ Sabatu.’​—Matayo 12:2.

Jufarisayo giwacu nia ng’atu m’ujaku cam ma calu ve nganu man eng’inye ku cinge kara emwode, eromrom ve ekayu nganune man ewaye i pany. (Ai 34:21) Ginwang’u nia jucopo timo ngo tic nyanok de i ceng’ Sabatu, pieno gidwoko Sabatu udoko ni ter, ma ke nwang’u i andha ebino nindo ma jubedo i ie kud anyong’a, man ma juponjo i ie Lembe pa Mungu. Pi nitwinyo paru migi, Yesu umio lapor ma tung’ tung’ m’unyutho nia Yehova Mungu umio ngo cik mi Sabatu kara juwore i kite ma gibeworo.

Mi kwong’o, emio lapor pa Daudi ku dhanu pare. Kinde ma kec umakugi, giwok gimondo i hema man gicamu kwen m’anyutha, niwacu kwen ma jubed juketho iwi meza i kaka maleng’ mi hema kunoke mir hekalu, man jubed juwile kubang’ ceng’ Sabatu. I andha, julam re ma camu kwen maeno ka judaru game kud i wang’ Yehova man juwile ku ma mor. Re Daudi ku dhanu pare gicame pilembe gibino i lembe ma tek, man jukwanu ngo igi nia gituro cik.​—Lembe mi Julawi 24:5-9; 1 Samwil 21:1-6.

 Mir ario, Yesu umio lapor mae: ‘Kadi wusomo ngo i cik, nia i ceng’ Sabatu julam mir hekalu gikadhu ku wi ceng’ Sabatu, man gibedo ku dubo ngo?’ Emito ging’ei nia kadok i ceng’ Sabatu de julam gibed githumo lei pi nithiero lam, man gibed gitimo tic mange bende i hekalu. Yesu uyero igi kumae: “Ento awacu iwu, nia acel nuti keni ma sagu hekalu.”​—Matayo 12:5, 6; Wel 28:9.

Pi niketho ginyang’ ikum lembe maeno, Yesu umio kendo Giragora, ewacu kumae: “Ento tek wung’eyo thelembe nini, ayenyo kisa, lam ungo, kuno di wupoko lembe rac ungo wi ng’atu ma dubo mbe kude.” Edaru wec pare kumae: ‘Kum Wod dhanu en e Rwoth mi Sabatu.’ Yesu ubino weco iwi Ker pare mi kwiocwiny ma bibimo pi oro elufu acel.​—Matayo 12:7, 8; Hoseya 6:6.

Pi rundi ma dupa, Sitani uketho dhanu ni ng’eca mi masendi, man enyayu rop ku lwiny i wang’ ng’om zoo. Re lembe bilokere kinde ma Sabatu madit ma tie bimobim pa Kristu bicaku; wabinwang’u yom mandha ma wabekuro kud ava ma lee dit!