Kinde ma Yesu ubeponjo dhanu i ng’om Kaisaria Filipi ma nwang’ere i kilometre 25 ku got Hermon, eyero wec moko m’uwang’u i jukwenda lii, ewacu kumae: “Awacu iwu andha kumae, jumoko ma kind ju m’ucungo kakeni bibilo tho ki ngo, ma fodi gikuneno Wod dhanu ngo m’ubebino i Ker pare.”​—Matayo 16:28.

Julub gipenjiri lee dit nia Yesu ubemito yero ang’o. Yenga acel kumeni ing’eye, Yesu uting’o jukwenda adek giidho kugi malu iwi got; eting’o Petro, Yakobo man Yohana. Copo bedo gicidho uthieno, pilembe nindo ubino nuro jukwenda adek maeno. Kinde ma Yesu uberwo, kite ulokere ma gibeneno. Gineno wang’e uberieny calu ceng’, bongu pare de uberieny man uberiang’ini.

E dhanu ario ma ginen ve ‘Musa gikud Eliya’ gitundo. Gicaku weco ku Yesu pi ‘tho pare ma bitimere i Yerusalem.’ (Luka 9:30, 31) Nwang’u iwang’e nyanok, Yesu uai unyutho ni julubne pi tho man pi cer pare. (Matayo 16:21) Wec maeno ma giweco unyutho nia tho mi lewic m’ubekuro Yesu copo urere ngo, tung’ ku paru ma Petro ubino ko.

Saa ma jukwenda adek maeno giceu terere, gineno man giwinjo lembe m’uthwoyo dhoggi magwei. Lembe ma gineno ubino ginmawokiwang’, ento enen ni lembe m’ubetimere andha, ma dong’ Petro unwang’ere nia en de eni lembene, uketho ewacu kumae: ‘Japonji, ber iwa kum wani keni: wek watim odbak adek; acel iri, acel ni Musa, acel ke ni Eliya.’ (Marko 9:5) Nyo Petro ubemito egier odbak maeno pilembe ebemito ginmawokiwang’ne umedere asu?

Kinde ma fodi Petro ubeweco, afuru m’urieny uumogi man dwal uwinjere kud i afurune uwacu kumae: “Meni Woda ma jamerna, ma anyong’a nega i kume; wuwinje.” Saa ma jukwenda giwinjo dwand Mungu, lworo umakugi man gipodho arieba wang’gi, ento Yesu uyero igi kumae: “Wuai malu, lworo kud unegwu.” (Matayo 17:5-7) Kinde ma giai, gineno Yesu kende m’utie. E ginmawokiwang’ne ujik. Kinde ma piny ulero, giloro kud iwi got man Yesu ung’olo igi kumae: “Kud wuyer pi ginmawokiwang’ ni ng’atu moko, ma fodi Wod dhanu kucer ungo ku kind ju m’utho.”​—Matayo 17:9.

Calu ma jukwenda gineno Eliya de i ginmawokiwang’, lembuno ucwalugi nipenjo Yesu kumae: ‘Ka kumeno jugorcik giwacu nedi nia Eliya bikolarbino be?’ Yesu udwoko igi kumae: ‘Eliya daru bino endre ging’eye ngo, ento gitimo gin ceke ma giyenyo i kume.’ (Matayo 17:10-12) Yesu ubino weco pi Yohana ma Jababutisi, m’utimo tic marom ku ma Eliya de utimo. Eliya uyiko yo ni Elisha man Yohana ke uyiko yo ni Kristu.

Ginmawokiwang’ maeno uketho cwiny Yesu man jukwenda lee dit! Gineno nyanok kende, dwong’ ma Kristu bibedo ko i Ker pare. Calu ma Yesu ular ung’olo, andha julub gineno “Wod dhanu m’ubebino i Ker pare.” (Matayo 16:28) Saa ma gini wi got, gibino “jumulembe ma ku wang’ mi dwong’ pare.” Nindo moko iwang’e, Jufarisayo gimito nia Yesu uketim giranyutha m’unyutho nia andha etie Rwoth ma Mungu ung’io, ento etimo ngo acel de. Re elund eyio julubne moko m’ebedo kugi saa ceke ginene kinde ma kite ulokere; kite m’ulokerene upong’o lembila ma tung’ tung’ m’uweco iwi Ker. Pieno, Petro udok ukiewo kumae: “Wabedo ku lembila ma judwoko tek ma sagu.”​—2 Petro 1:16-19.