Kinde ma Juyahudi moko gidoto Yesu nia eturo cik mi Sabatu pilembe ekeyo kum ng’atu moko i ceng’ nica, Yesu udwoko igi kumae: “Vwa ubetimo tic cil ku kawono de, man an de atimo tic.”​—Yohana 5:17.

I andha, lembe ma Yesu utimo uturo ngo cik pa Mungu iwi Sabatu. Yesu urweyo lembanyong’a man ekeyo kum dhanu pilembe eneno Mungu de utimo tic mabeco. Pieno Yesu umedere nitimo lembe mabeco kubang’ ceng’. Lembe m’edwoko ni ju m’udote uketho kwinyo umakugi lee mandha nisagu mi wang’e, man giyenyo yo mi nege. Pirang’o kwinyo umakugi?

Iwang’e, gilar gidoto Yesu nia eturo cik mi Sabatu, kawoni Yesu uyero igi nia etie Wod Mungu; wec maeno re m’unyayu kwinyo magwei i igi. Ginwang’u nia eca Yesu uyero lembacidi, man ebekethere gire rom ku Mungu. Ento m’umbe lworo, Yesu ukoro igi lembe mange dupa iwi mer pare masegi ku Mungu, ewacu kumae: “Kum wego maru Wod, man enyutho ire gin ceke m’etimo en.”​—Yohana 5:20.

Wego utie Jamii kwo, man emio bende copo mi cero ju m’utho ni dhanu moko. Yesu umedo kendo kumae: “Kum calu Wego ting’o ju m’utho, man emio igi kwo, e Wod bende mio kwo ni ju m’eyenyo kumeno.” (Yohana 5:21) Eno tie wec ma pire tek mandha man m’ubemio iwa genogen pi nindo m’ubino! Kadok tin de Wod ubedwoko jum’utho kwo i thenge mi tipo. Pieno, Yesu uyero kumae: “Ng’atu m’uwinjo lem para, m’uyio Ng’atu m’uora de, kwo ma rondo ku rondo ni kude, man ebino ngo i pokolembe, ento ekadhu kud i tho emondo i kwo.”​—Yohana 5:24.

Nitundo saa maeno nwang’u fodi Yesu ucero ngo ng’atu moko m’utho, ento ebenyutho ni ju ma gibedote nia kit cer maeno bitimere andha. Eyero igi kumae: “Saa bebino, ma ju m’i liel ceke biwinjo ie dwande, man gibiwok woko.”​—Yohana 5:28, 29.

Kadok Yesu bibedo japoklembe man ebicero ju m’utho de, re enyutho kamaleng’ nia Mungu dit nisage. Ewacu kumae: “Acopo timo gin moko gira ngo. . . . Kum asayu yeny ma ia yenyo ngo, ento yeny ma i Ng’atu m’uora yenyo re.” (Yohana 5:30) Yesu ukoro pi tic ma pire tek m’etie ko i lembakeca pa Mungu i kite ma ngbeng’ ma nwang’u fodi i wang’e ekoro ngo kumeca. Ju m’udoto Yesu gilar ging’eyo bende lembatuca mange i wie yor i wang’e. Epoyo wigi kumae: “Wuoro kwenda ba Yohana ma [Jababutisi], en de enyutho nia en e lemandha.”​—Yohana 5:33.

Copere nia oro ario iwang’e, ju m’udoto Yesu gilar giwinjo Yohana ubenyutho ni judong’ dini mi Juyahudi pi ng’atu moko m’ubebino ing’eye ma julwong’e “jabila” man “Kristu.” (Yohana 1:20-25) Epoyo wigi nia gibed gineno Yohana ma kawoni ni i kol ni ng’atu ma pire tek, ewacu igi kumae: “Wuyio ya anyong’a negwu mi nindo moko i der pare.” (Yohana 5:35) Re asu enyutho igi lembe lee nisagu ma Yohana ma Jababutisi unyutho.

Yesu uyero kumae: “tic maeni m’atimo [uketho i ie mi keyokum m’eai etimo] enyutho pira, nia Wego ora.” Emedo kendo kumae: “Man Wego m’uora, enyutho pira.” (Yohana 5:36, 37) Ku lapor Mungu unyutho pi Yesu kinde m’ebelimo batizo.​—Matayo 3:17.

Andhandha, ju ma gidoto Yesu gibino mbe ku thelembe mi kwere, kum kadok Lembagora ma giwacu nia ging’eyo lee de utuco lembe iwi Yesu. Yesu udaru wec pare kumae: “Kum tek wuyio Musa, kuno di wuyio an; kum egoro pira. Ento tek wuyio Lembagora pare ngo wubiyio lem para nenedi?”​—Yohana 5:46, 47.