Kinde ma jukwenda giberweyo lembanyong’a i Galilaya, ng’atu m’ugam uwacu nia nen nyathi rombo pa Mungu, ubino mbe ku kaka mi timo lembe ma gibetimo. Yohana ma Jababutisi ubino asu i otkol pi oro ma romo ario.

Yohana uyero ma lworo mbe ni Ubimo Herode Antipa nia, kud egam ci umin ma Filipo. Nwang’u dong’ Herode uriemo dhaku pare kara egam Herodia. Nimakere ku Cik pa Musa, kit gam maeno utie timo gier, man eyiyere ngo. Herode de uloko nia ebeworo Cik maeno. Re calu ma lembuno ufoyo ngo ie, eketho jutwiyo Yohana i otkol, ecicopere nia Herodia re m’ucung’o lembe i ie.

Herode ung’eyo ngo gin m’ukwayu etim ikum Yohana, pilembe ‘dhanu ginene calu jabila.’ (Matayo 14:5) Herodia ke ubino ku lembe ma tung’ i ie. “Ekece [man] eyenyo enege.” (Marko 6:19) E nindo acel, yamu ubin uredho bel ni ungwal.

Nyanok i wang’ Kadhukuwijo mi oro 32 R.M., Herode ugam uyiko foc ma dit pi nindo mi nyoliri pare. Judongo mi ker pare, jego pare, ku judongo mi ng’om Galilaya ceke gibino i nambu nino. Kinde ma nambu cek, Salome ma tie nyaku pa Herodia, m’enyolo ku Filipo, m’ubino cware ma kwong’a, ubino nimiel iwang’ welo. Miel pare unyang’u dhanu ceke.

Mielne ufoyo i Herode lee, uketho eyero ni nyakune kumae: “Kwai gin ma tek iyenyo, e abimio iri.” Bende ekwong’o ire ni kwong’ kumae: “Gin ma tek ikwaya ko, ebimire iri, kadok ng’et ker para.” Salome ucidh upenjo min iwang’ nidwoko wang’ wec p’ubimo, ewacu kumae: “Akwai ang’o?”​—Marko 6:22-24.

Eno tie tap lembe ma Herodia ubino nisayu! Pio pio egamu dhu nyare, ewacu kumae: “Wi Yohana ma Jababutisi.” E ndhundhu Salome udok ibang’ Herode, man ewacu ire nia, “Ayenyo ya imi ira wi Yohana ma Jababutisi kawono i atangla.”​—Marko 6:24, 25.

Lembuno unyayu can i Herode, ento edaru nikwong’o ni Salome iwang’ dhanu. Ecikere nitimo lembe m’eyero, kadok nwang’u ubekwayu nia eneg ng’atu m’udubo ngo de. Pieno, Herode uoro askari acel ma kuro kume ucidh utim lembe maeno mi can. E ndhundhu nica, askarine ukelo wi Yohana i atangla, emie ibang’ Salome. Salome ke utere ibang’ min.

Kinde ma julub pa Yohana giwinjo nia junego Yohana, gibin gigamu avuje, man gicidh giyike. Gidok giyero pi lembene ni Yesu.

I ng’eye, lworo umaku Herode kinde m’ewinjo nia Yesu ubekeyo kum dhanu, man ebewodho pajogi. Ebino niparu nia ng’atu m’ubetimo udu maeno, utie Yohana ma Jababutisi, eparu nia edaru ‘nicer ku kind ju m’utho.’ (Luka 9:7) Pieno Herode Antipa umito ekenen Yesu kokoro. Eyenyo enene ungo pi niwinjo ponji pare. Ento, emito enen Yesu pi ninyang’ nia nyo andha lembe m’ebeparu utie kumeca kunoke ngo.