Ing’ei ma kit Yesu ulokere man ewodho tipo m’ucido kud jalawobi moko i Kaisaria Filipi, ecidho i Kapernaum. Ecidho nyaling’ ku julubne kende, pilembe “eyenyo ngo ya ng’atu moko ng’ei.” (Marko 9:30) Kinde ma giwok i yo, enyutho kendo ni julubne pi tho pare man pi tic ma gibitimo ing’eye, eyero kumae: “Jubimio Wod dhanu i cing’ dhanu: e gibinege, i ceng’ mir adege ebicer.”​—Matayo 17:22, 23.

Paru maeno ubino ngo lembe manyen ni julub, pilembe iwang’e de Yesu ular uyero pi nek ma jubinege ko, ma Petro ugam ukwero ko nia lembe maeno kud uwok ikume ki. (Matayo 16:21, 22) Bende, jukwenda adek gineno kit Yesu ulokere man giwinjo Yesu ubeweco ku Musa man Eliya iwi “tho” pare. (Luka 9:31) Kawoni “can ma dit apila” umaku julub pi lembe ma Yesu uai uyero igi, kadok nwang’u ginyang’ ungo cuu ikum lembene de. (Matayo 17:23) Re gibelworo nipenje.

E gitundo i Kapernaum, kaka ma Yesu ubed ubedo i ie wang’ mapol; jukwenda ma dupa de thugi ni adhura maeno. E dhanu moko ma joko ajok mir hekalu ubino ibang’ Petro. Saa moko nyo gimito gidot Yesu nia eculo ngo ajok mir hekalu, pieno gipenjo Petro kumae: “Japonji peri mio ng’et sente [ajok mir hekalu] ngo?”​—Matayo 17:24.

Petro udwoko igi kumae: “Eyo” emio. Yesu unyang’ ikum wec m’uai ukadhu; pieno kinde ma Petro ucidh unwang’ugi, ekuro ngo nia Petro re m’ucak wec, ento en re m’epenje kumae: “Ii bepido nik ang’o Simoni? ju m’ubimo m’i ng’om gigamu jambng’om kadi ajok de ba ng’a? ba wotgi, kadi bang’ umondo?” Petro dwoko kumae: “Bang’ umondo.” Yesu udok uwacu ire kumae: “Ka kumeno wot gibedo agonya.”​—Matayo 17:25, 26.

Won Yesu re ma tie Ubimo mi polo ku ng’om zoo man En re ma jumio ire thier i hekalu. I andha, Wod Mungu copo culo ngo ajok mir hekalu. Yesu udok uwacu kumae: “Ento kara ku waketh gikier, cidh i nam, ibol gol de, man ijak rec m’ular uwok; kan iyabu dhoge de, ibinwang’u sente; iting’ maeno, imi igi kakara wakudi de.”​—Matayo 17:27.

Ing’eye nyanok, saa ma julub gibedo karacelo, gipenjo Yesu nia ng’a ma dit ma sagu i Ker mi polo. Nwang’u iwang’e, gin marom nini gibino ku lworo nipenje iwi tho pare, re kawoni lworo ubenegogi ngo nipenje iwi lembe ma gibinwang’u. Yesu ung’eyo paru migi pilembe kinde ma gibedwogo i Kapernaum, ebino wotho i wang’gi man ewinjo kite ma gibepiemiri ko iwi dito. Pieno epenjogi kumae: “Ande wuporo lembang’o i gengi?” (Marko 9:33) Lewic umakugi e giling’ ting’, kum gibino piemiri ikindgi nia ng’a ma dit ma sagu. Re nitundo gibin gipenjo Yesu buu iwi lembe ma gibino piemiri iwie i gengi, giwacu kumae: “ng’a ma dwong’ ma sagu i Ker mi polo?”​—Matayo 18:1.

Julub gicopo piemiri nenedi iwi dito ma ke gikwo karacelo ku Yesu man giwinje pi oro ma romo adek zoo ee? Poi nia gitie dhanu, gileng’ ungo, man bende gidongo i dini ma juneno dito ni gin ma pire tek i ie. M’umedo maeno, Yesu ular ung’olo nia ebimio “kifungula” moko mi Ker ibang’ Petro. Nyo eno uketho Petro unwang’ere nia e dit nisagu jumange? Yakobo giku Yohana bende gicopo nwang’iri nia gidit, pilembe kit Yesu ulokere iwang’gi.

 Nwang’u niki gineniri nia gidit kunoke ngo, re Yesu utwinyo paru migi. Elwong’o nyathin ma nyanok ubin ucungo ikindgi, man ewacu kumae: “Tek wulokru ngo, wudoko calu nyithindho ma thindho de ngo, wubimondo i Ker m’i polo ki ngo. Ka kumeno ng’atu ma tek bijwigre gire va nyathin ma nyanok maeni, ng’atuni e ma dwong’ ma sagu i Ker m’i polo; man ng’atu ma tek bijolo nyathin ma nok acel ma kumeni i nyinga meca ejolo an.”​—Matayo 18:3-5.

Yesu utio ku bodho ma cuu mandha mi ponji! Ng’ecwiny umake ngo ikum julubne man eyero ngo igi nia gitie dhanu ma gimaru dito akeca. Ento emaku igi lapor pa nyathin ma nyanok. I andha, awiya ma thindho giyenyo ngo dito kunoke nibimo wi jumange. Yesu ubemito gin de gibed ve awiya. E niai ikum lapor maeno Yesu uwodho ponji mae: “Kum ng’atu ma nyathigi i kindwu ceke, ng’atuno en e dit.”​—Luka 9:48.