Petro uai uwinjo lembe ma Yesu ukoro iwi kite mi daru thubiri ikindjo m’umbe niroyo jumange. Re ebemito ekeng’ei nia juromo timo kisa wang’ adi tap.

Pieno epenjo Yesu kumae: “Rwoth, umira bidubo wang’ adi ira, m’awek ire woko? kadok wang’ abiro?” I rundi maeca, judong dini moko gibed giponjo nia ng’atini copo weko lembe ni wadi nitundo wang’ adek. Pieno Petro uparu nia kan etimo kisa “wang’ abiro” eca nwang’u dong’ etimo wang’ lee nisagu zoo.​—Matayo 18:21.

Re i ponji pa Yesu, eweco ngo kadok nyanok de iwi paru mi kwanu wend kosa ma jumange timo iwa. Pieno, etwinyo paru pa Petro kumae: “Awacu iri ngo kumae, cil wang’ abiro, ento kumae, cil wang’ pier abiro wi abiro.” (Matayo 18:22, NWT) I kite mange, Yesu umito yero nia ajiki mi weko lembe umbe. Pieno, Petro ucikere ngo nikwanu nia ukwayu ewek lembe wang’ adi ni umin.

Pi ninyutho nia Petro man jumange bende gicikiri nitimo kisa, Yesu ugam umio lapor pa jamiru moko m’utimo ngo kisa ni wadi calu ma rwoth pare utimo ire. Rwoth maeno umito ekwan wel banja ma jumiru pare ucikiri niculo ire. E jukelo jamiru moko ibang’e ma tie ku banja ma lee dit mi talanto 10 000 [Denarii milioni 60]. Rieko m’ecopo culo ko deni maeno de dong’ umbe. Pieno, rwoth pare ung’olo nia julwore ku dhaku kud awiya ku piny pare ceke. Kinde ma jamiru eno uwinjo kumeno, epodho arieba wang’e i the tiend rwoth pare man epaku dhoge ire kumae: “Rwoth, twi cwinyi i kuma, man abiculo iri ceke.”​—Matayo 18:26.

Kisa umaku rwoth i kume, pieno eweko ire thwo banja ma lee maeno pet. Saa ma jamiru maeno udok, ewok enwang’u jamiru wadi ma tie ku banja pare denarii 100 kende. Eng’wenyo dwand jamiru wadine man ecaku nideye m’ebewacu ire kumae: “Cul wang’ banja [para].” E jamiru ma jubedeyone upodho piny i the tiend wadi man epaku dhoge ire kumae: “Koitwi cwinyi i kuma do, man abiculo iri.”  (Matayo 18:28, 29) Re wi jamiru maeno uwil nia rwoth pare utimo ire kisa man nwang’u en de ukwayu elub lapor pa rwoth pare. Ento eting’o jamiru wadi ma tie ku banja pare ma nyanok mandha man ecidh ebole i kol nitundo ebiculo banjane.

Yesu udok ukoro nia, kinde ma jumiru mange gineno kite ma jamiru ma juweko ire banja ubesendo ko wadi ku kwarcwinye, gicidh gidwoko lembene ni rwoth. Kwinyo ulund umaku rwoth, e eketho jukelo jamiru maeno ma cwinye rac man ewacu ire kumae: “In i jatic ma rac, aweko banja maeno ceke iri, kum ipaku dhogi ira: in ke emaku ngo itim ku ngisi kum jatic wedu, cil calu atimo ku kisa i kumi?” E emio jamiru maeno ma kisa mbe i ie ibang’ jukur dhu kol nitundo en de ebiculo sente pa rwoth ma ni ie tup. Yesu udolo dhu wec kumae: “E Vwa m’i polo bende bitimo iwu kumeno, tek wuweko kier mir umego woko ngo kubeng’wu kubeng’wu ku i adundewu.”​—Matayo 18:32-35.

Lapor maeno ubeponjowa lee mandha iwi timo kisa! Mungu uweko iwa banja ma lee dit mi dubo ma jucopo pimo ngo nyanok de ku kosa ma Jukristu wadwa betimo iwa, kadok nwang’u ebed rukani. Bende, Yehova betimo iwa kisa wang’ acel kende ngo, ento wang’ ma kwanere ngo. Dong’ wan ke nyo wacopo timo ngo kisa ni umego mwa wang’ dupa kadok nwang’u lembe ni iwa i kume? Calu ma Yesu uponjo iwi got, Mungu biweko iwa “banja mwa, calu wan bende waweko mi jubanja mwa.”​—Matayo 6:12.