Yesu ku julubne ang’wen girio duu i tic i Kapernaum. I dhu uthieno, dhanu mi Kapernaum gikelo jurutwoyo migi ibang’e kara ekei kumgi. Pieno Yesu ubino ku saa nyanok magwei m’eromo rwo ko ibang’ Won.

Urwonde apokapiny ma fodi piny ulero cuu ngo, Yesu uai man ewok kende. Ecidh enwang’u kaka moko ma ling’ m’ecopo bedo ie kende pi nirwo ibang’ Won. Re fodi ecidho nyanok eni ci, julubne gipoi nia embe, e “Simon ku ju ma gibedo kugi” gicaku saye. Ecicopere nia Petro re m’utelo wigi, pilembe Yesu ubino i ot pare.​—Marko 1:36; Luka 4:38.

Kinde ma ginwang’u Yesu, Petro uyero ire kumae: “Dhanu ceke gibeyenyi.” (Marko 1:37) Ma jiji mbe, dhanu mi Kapernaum gimito ngo Yesu ucidhi kamoko. Andha gifoyo lembe ma Yesu utimo, pieno giyenyo “gicere, nia kud ewekgi.” (Luka 4:42) Re nyo lembe mi kwong’o m’ukelo Yesu i ng’om utie nitimo udu mi keyo kum dhanu? Nyo ebitimo tic pare i pacu maeno kende? Eyero ang’o pi ticne?

Yesu udwoko ni julubne kumae: “Wek waci kamange i pacu ma ceng’ni, kara ayer kuca bende; kum abino kum lembe nini.” Eyero bende ni dhanu m’ubemito gicere kumae: “Akociyero lembanyong’a mi Ker pa Mungu bang’ adhura mange bende be: kum juora kum maeno.”​—Marko 1:38; Luka 4:43.

Thelembe mi kwong’o m’ukelo Yesu i ng’om utie nirweyo lembanyong’a mi Ker pa Mungu. Ker maeno bidwoko nying’ Mungu leng’ man ebikeyo twoyo ceke kud ikum dhanu. Yesu utimo udu mi keyokum pi ninyutho kamaleng’ nia andha Mungu re m’uore. Oro dupa yor i wang’e, Musa bende utimo udu ma lee pi ninyutho nia Mungu re m’uore.​—Ai 4:1-9, 30, 31.

Pieno, Yesu ku julubne ang’wen giai kud i Kapernaum gicidho pi nirweyo i adhura mange. Julubne ubino Petro kud umin ma Andrea, man Yohana kud umin ma Yakobo. Gin re ma gibino julub ma kwong’a ma Yesu ular ulwong’ogi yenga moko iwang’e, pi niwotho karacelo kude i tic.

Lembanyong’a ma Yesu urweyo ku julubne ang’wen i Galilaya uwodho cegonying’ maber mandha! M’umbe jiji, pi Yesu ung’eyere lee dit. “Pire yik cil i Cami ceke,” nitundo i kabedo moko ma tie kud adhura apar ma julwong’o Dekapoli, man nikadhu loka kulo Yordan bende. (Matayo 4:24, 25) Udul madit m’uai i pacu maeno ceke ku ju m’uai i Yahudi bende gilubo tok Yesu ku julubne. Ju mapol ukelo jurutwoyo ibang’e kara ekei kumgi. Yesu uriemogi ngo, ento ekeyo kumgi man ewodho tipo m’ucido kud i dhanu.