Kinde ma julub pa Yesu ginyiko i dhu wat yong’ei wavuvu m’usendogi, gibino asu ku lworo. Co moko ario ma kwiny ma giweg pajogi giwok kud ikind liel, giring’ini ibang’ Yesu! Giragora uweco akeca iwi ng’atu acel, saa moko nyo pilembe en re m’ebino kwiny nisagu ma kucelo, man bende nyo pajogi usende pi nindo ma lee.

Ng’atu marac maeno, ubed uwotho muneru dieceng’ ku diewor, ‘ebed ekok akoka kud ikind liel, man ku wi gudi, man ebed ethumbre gire ku kidi.’ (Marko 5:5) Ebedo kwiny akeca, uketho dhanu ubed ubedo ku lworo nikadhu kud i yo m’enwang’ere i ie. Jumoko upimo nitwie ku nyoro, re ecodo nyoronegi cen, man ecodo kadok kongo ma jutwiyo ko tiende. Ng’atu moko acel de mbe ma copo nibimo wie.

Kinde ma ng’atuno utundo ceng’ni ku Yesu, epodho i the tiende, e pajogi m’ubesende uketho ekok kumae: “Lembe mwa ang’o wakudi, Yesu, in i Wod Mungu ma Malu ngbir. Aketho ikwong’o ba Mungu, kud imi ira ndiba.” Yesu unyutho nia etie ku tego iwi pajogi, uketho eng’olo igi kumae: “Wok woko kud i ng’atuno, in i tipo m’ucido.”​—Marko 5:7, 8.

M’umbe jiji, ng’atuno ubino ku pajogi dupa i ie. Kinde ma Yesu upenje nia, “Nyingi ng’a?” Eloko ire kumae: “Nyinga Udul; kum wadupa.” (Marko 5:9) I Roma, udul askari acel, bebedo kud askari elufu swa; pieno ng’atu maeno de ubino ku pajogi dupa m’ubino nisende. Gikwayu Yesu nia, “kud eng’ol gicidh i longoro ma there mbe.” Ecicopere nia ging’eyo pi pokolembe m’ubekurogi ku jadit migi ma Sitani.​—Luka 8:31.

Ceng’ini kugi, jubino nikwayu udul kul ma romo 2 000. Nimakere ku Cik, kul ubino lei m’ucido, man eyiyere ngo ni Juyahudi nia gitung kul. Pajogi uyero ire nia, “Orwa i kul, kara wamond i igi.” (Marko 5:12) Yesu uyio igi, e gicidh gimondo i kul. Kul ma romo 2 000 ucidh upiey i nam kud i dhu longoro, e githung’.

Kinde ma dhanu m’ubekwayu kul gineno lembe maeno, giringo pio pio i adhura, man i  pacu mange ma ceng’ini, pi nikoro lembuno ni dhanu. Dhanune gibino nineno lembe m’utimere. Kinde ma gitundo, ginwang’u jalawobi maeno ma pajogi uwok kud i ie, dong’ utie maber ma wie ulero. Juronyo bongu ikume man ebedo i the tiend Yesu!

Dhanu m’uwinjo lembe maeno, kunoke m’uneno jalawobine, gibedo ku lworo pi lembe mange ma Yesu copo timo. Gikwayu nia timba Yesu uwek ng’om migi. Kinde ma Yesu umaku yei pi niai ku keca, ng’atu ma juwodho pajogi kud i ie ukwaye nia ewek elub toke. Ento Yesu uyero ire kumae: “Dok i ot peri ba jurimbi, yer igi rama [Yehova] utimo ko gin ma dit iri, man rama kisa nege ko i kumi de.”​—Marko 5:19.

Yesu ubed ung’olo ni ju m’ekeyo kumgi nia kud gibed giyer lembe m’etimo igi ni dhanu mange, pilembe emito ngo dhanu giyie pi wec ma giwinjo awinja. I lembe maeni, ng’atu ma juwodho pajogi kud i ie uneno andha nia Yesu utie ku tego, man ecopo nimio lembatuca ni dhanu mange ma Yesu bitundo ngo i bang’gi en ku kume. Lembatuca m’uai i dhogene re ma bijigo wec mi vupo ma dhanu biyero iwi kul m’ucidh uthung’. Uketho ng’atu maeno ucidh utuco lembe ma Yesu utimo irene cil i Dekapoli.