Yesu utimo tic lee dit kinde m’ebino i Galilaya. Re eyero nia, “akociyero lembanyong’a mi Ker pa Mungu bang’ adhura mange bende be;” eno nyutho nia Yesu uweco ngo pi Galilaya kende. Pieno, ecidh “eyero i kacokiri mi Yahudi.” (Luka 4:43, 44, NWT) Ecidho i saa maber, pilembe nwang’u nindo mi kayu mwoka uromo man agba moko de udhing’o i Yerusalem.

I buku mir injili juweco lee akeca iwi tic ma Yesu utimo i Galilaya, ento juweco nyanok kende iwi tic m’etimo i Yahudi. Kadok nwang’u dhanu mi Yahudi gijole cuu ngo de, re lembe maeno ucere ngo ku rweyo man ku timo udu kaka ceke m’ebed ecidho i ie.

Ing’eye nyanok, Yesu ucidho pi nitimo Kadhukuwijo mi oro 31 R.M. i Yerusalem ma tie adhura madit mi Yahudi. I adhura maeno kut moko nuti ma tie ku mbegi ma dongo, julwong’e Bethesda; kutne ni bor ungo ku dhugang’ mi rombe, kaka moko ma dhanu bepong’ i ie. Dhanu dupa ma gibetwoyo, ma gin abinga ma giweg abala gibed gibino i dhu pii maeno. Pirang’o? Pilembe dhanu mapol giyio nia ka ng’atu moko m’ubetwoyo umondo i pige saa m’ebedhenyini ci, e kume gam kei.

eng’ Sabatu uromo; Yesu ubekadhu man eneno ng’atu moko m’utwoyo doko oro 38 ubedo i dhu kut keca. Yesu upenje kumae: “Iyenyo kumi titre?” Ng’atune udwoko ire kumae: “Rwoth, ng’atu moko mbe ira, m’uketha i kut kinde ma pi bedhenyni: ento kinde ma abebino ng’atu mange lar loro ira.”​—Yohana 5:6, 7.

Yesu uyero lembe ma copo wang’u i jaratwoyo lii man i ng’atu moko ci m’ubewinjo, ewacu kumae: “Ai malu ting’ kavuto peri, iwothi.” (Yohana 5:8) Etimo tap calu ma Yesu uyero. Kume ukei wang’ acel, e eting’o kavuto pare man ecaku wotho!

Kinde ma Juyahudi gineno ng’atuno ku kavuto giweco ibang’e ku kwinyo kakare nibedo kud anyong’a pi lembe m’uai utimere, giwacu kumae: “Maeni ceng’ Sabatu, man cik uyio ngo nik iting’ kavuto peri.” Ng’atune dwoko igi kumae: “Ng’atu m’utito kuma, e m’uwacu ira kumae, ting’ kavuto peri, iwothi.” (Yohana 5:10, 11) Juyahudi maeno ginwang’u nia ng’atu m’ukeyo twoyo i ceng’ Sabatu nwang’u etimo lembe marac dit.

Gimito ging’ei ng’atu m’uyero ire nia, “ting’ kavuto peri, iwothi.” Ento ng’atu ma jukeyo kume ung’eyo ngo nying’ Yesu, pilembe Yesu “wodhre cen, udul dhanu de ni kakeca.” (Yohana 5:12, 13) Re umito ng’atu maeno gikeromb kendo ku Yesu. Ing’eye, ginwang’iri ku Yesu i hekalu, kan efoeng’eyo cuu ng’atu m’ukeyo kume i dhu kut.

Edok enwang’u Juyahudi m’ugam upenje nia enyuth ng’atu m’ukeyo kume, man ewacu igi nia Yesu ukeyo kume en. Kinde ma Juyahudi giwinjo kumeno, gicoko woth gicidh ginwang’u Yesu. Nyo gicidho kara ging’ei nia Yesu ubetimo udu ku tego makani? Ungo. Gicidho ibang’e kara gidote nia rac etimo tic maber i ceng’ Sabatu. Gicaku bende ninyayu ragedo ikum Yesu!