Kinde ma Yesu, Petro, Yakobo man Yohana giloko kud iwi got, giwok ginwang’u udul dhanu ma lee ucokiri. Lembe ujebere magwei. Jugorcik gicokiri ku julub gibepiemiri ikindgi. Kinde ma dhanu gineno Yesu ubebino, igi uwang’ lii man giringo gicidh gimothe. Yesu upenjo kumae: “Wupenjru kugi ku lembang’o?”​—Marko 9:16.

E ng’atu moko ma kind udul ubin urum iwang’ Yesu man eyero ire kumae: “Japonji, akelo woda i beng’i m’ubedo ku tipo m’ajuba; man ka ma tek tipo tere i ie ceke, eredhe piny: voyo de dhure i dhoge, man ekayu lake, emoge de: e awacu ni julubni ya giwodhe woko; e ecopre igi ngo.”​—Marko 9:17, 18.

Ecicopere nia jugorcik gibino nywaru julub man gibino cayugi pilembe gitundo ngo nikeyo kum jalawobi ma jukelo ibang’gi. Pieno, kakare niweco ibang’ won nyathin ma dong’ wie uthum, Yesu ulokere ibang’ udul dhanu, ewacu kumae: “E dhanum’utuk m’umbe yic ma cobo bende, wabibedo wakudu rokani? abisendra kudu rokani?” I andha, Yesu uyero wec maeno ma tego ni ie ni jugorcik ma gibino sendo julubne kinde ma fodi embe. Yesu udok ulokere ibang’ won nyathin man ewacu ire kumae: “Kele i bang’a ku.”​—Matayo 17:17.

Kinde ma jalawobine ubebino ibang’ Yesu, pajogi uredhe man ecaku fodere ma tek i ng’om. Eng’ielere i ng’om man voyo udhure i dhoge. Yesu upenjo won kumae: “Gin maeni make ugambre awene?” Edwoko ire kumae: “Ma fodi e nyathin. Ebed eredhe i mac kud i pi bende.” E ekwayu Yesu kumae: “Tek icopo timo gin moko, bed ku ngisi i kumwa, ikonywa.”​—Marko 9:21, 22.

 Cwiny won nyathin maeno udaru ng’abere lee dit, pilembe keyo kum wode uvoyo julub pa Yesu. Pi nidwoko wang’ lembe pare, Yesu utielo cwinye ku wec m’umio ire genogen, ewacu kumae: “Tek icopo! Gin ceke copre ni ng’atu m’uyio.” E ndhundhu nica won nyathin ukok, ewacu kumae: “Ayio; konya ku yioyic para m’umbe!”​—Marko 9:23, 24.

Yesu uneno udul dhanu ubering’ini ibang’e. Pieno, ejuko tipo m’ucido i wang’gi keca, ewacu kumae: “In i tipo ma weco ngo ma winjo de ngo, ang’olo iri wok kud i ie, kud i dong’ imond i ie kendo!” Saa ma tipo m’ucido ubewok kud i ie, jalawobine ukok man epodho i ng’om ecaku ng’ielere. E evuto calu ng’atu ma dong’ utho. Dhanu mapol ma ginene giwacu kumae: “Etho!” (Marko 9:25, 26) Ento kinde ma Yesu umaku cinge, eting’e malu “e eai” ma dong’ kume ukei. (Matayo 17:18) Ma jiji mbe, lembe ma Yesu utimo uwang’u i dhanu lii.

Nindo moko iwang’e kinde ma Yesu uoro julubne gicidh girwei, giwok giwodho bende pajogi. Pieno, saa ma gicidho i ot moko gini kendgi, julub gipenjo Yesu kumae: “Nedi wacopo wodhe ngo?” Yesu ukoro igi nia wodhe uvoyogi pilembe gibino mbe ku yioyic, ewacu kumae: “Wagi gino wodhre ku gin moko ngo, ndhu ku rwo.” (Marko 9:28, 29) Kara pajogi ma tie ku tego uwoki, ugam ukwayu julub gibed ku yioyic ma tek man girwo ibang’ Mungu kara ekonygi ku tego pare.

Yesu udaru wec pare kumae: “Kum awacu iwu andha kumae, tek wubedo ku yioyic ma ro ku nying atingli, wubiwacu ni got maeni kumae, ai kakeni ci kuca; e ebiai: gin moko mbe de ma bicopre iwu ngo.” (Matayo 17:20) Andha, yioyic utie ku tego ma lee dit!

Peko kunoke lembe moko ma tek ma copo cerowa nimedara nitimo ni Yehova copo nen pek ve got. Re ka watie ku yioyic, wacopo nivoyo peko maeno ma pek calu got.