Ing’ei ma Yesu ujuko Jufarisayo ikum lembe migi mi kei, giai ku julubne ku keca. Gicidho i pacu mi Turo ku Sidon i ng’om mi Foiniki, ma nwang’ere i kilometre dupa i ng’ete ma yo malu.

Yesu uwok unwang’u ot moko m’ebedo i ie, re ebemito ngo dhanu ging’ei nia eni kakeca. Ento ecopo pondo ngo ni dhanu, pieno ginyang’ boo nia eni keca. E Dhayunani moko ma thugi ni pacu maeno ubino ibang’e man ekwaye kumae: “E Rwoth, i wod Daudi; nyara besendre dit ku pajogi.”​—Matayo 15:22; Marko 7:26.

Ing’eye nyanok, julub gikwayu Yesu kumae: “Keth ecidhi; kum ebekok ing’eiwa.” Yesu ulund ukoro igi thelembe m’uketho ebedieng’ ungo kude, ewacu kumae: “Juora ngo [ni jumange] ento ni rombe m’urwinyo m’i ot pa Israel kende.” Cwiny dhaku maeno utur ungo, ento ebin epodho i the tiend Yesu man ekwaye ku kisa kumae: “Rwoth, konya do!”​—Matayo 15:23-25.

Saa moko nyo pi nimulo yioyic pa dhaku maeno, Yesu uyero wec ma Juyahudi gibed gitio ko pi nicayu thek mange, ewacu kumae: “Emaku ya jugam kwen mi nyithindho ngo jubol ni [nyithi] gwogi.” (Matayo 15:26) Kite ma Yesu uyero ko wec ma nia nyithi “gwogi” unyutho kisa m’etie ko ikum dhanu ma gitie ngo Juyahudi. Kisane unyuthere kamaleng’ nikadhu kud i wec pare man enen i wang’e.

Kakare nimaku ng’ecwiny, dhaku maeno ujwigere man emaku dhu wec ma Yesu uyero ire, m’unyutho kite ma Juyahudi gibed gicayu ko thek mange, ewacu kumae: “Eyo, Rwoth, kum cil [nyithi] gwogi gicamu ng’ili m’upodho ku wi mesa pa weggi.” Yesu uneno nia etie kud adunde m’atira, pieno ewacu ire kumae: “E dhaku, yioyic peri bedo dit: dong’ etimbre iri cil calu iyenyo.” (Matayo 15:27, 28) E kum nyare ukei wang’ acel, kadok nwang’u ebino mbe kakeca de! Kinde ma dhaku maeno udok i pacu, ewok enwang’u nyare uvuto ma dong’ ekei; “pajogi de daru wok”!​—Marko 7:30.

Yesu ku julubne giai kud i Foiniki man ging’olo yor i thiwi kulo Yordani. Ecicopere nia gikadhu kulo Yordani, i thenge ma yo malu mi nam Galilaya man gicidho i ng’om mi Dekapoli. Kinde ma gitundo, giidho iwi got re dhanu ulubo tokgi kuca. Gikelo weg abala, jurutwoyo, abinga man buba. Gipielo jurutwoyo maeno i the tiend Yesu, e ekeyo kumgi. Lembuno uwang’u i dhanu lii, pieno gimio yung ni Mungu mir Israel.

Ento Yesu uloko wang’e zoo ibang’ ng’atu moko ma ithe dhing’ man ma buba. Kepar kite ma ng’atuno copo winjere ko ikind udul dhanu. Saa moko nyo Yesu uneno nia lworo ubenege, pieno eting’e ecidho kude ang’et nyanok. Kinde ma gitie kendgi, Yesu unyutho ire lembe m’ebecitimo. Eketho lwete i ith ng’atuno, ing’eye eng’ulo lau i cinge man emulo lebe. E eng’ayu wang’e i polo, man ewacu kumae: “Efatha” thelembene, “Yebri.” E ndhundhu ithe ucaku winjo lembe man ecaku weco. Yesu umito ngo rwonglembe maeni ulal swa ikind dhanu, ento emito ng’atuman uyie iwi lembe m’eneno ku wang’e man m’ewinjo ku ithe.​—Marko 7:32-36.

Kinde ma dhanu gineno udu mi keyokum ma Yesu utimo, “igi wang’ lii apila, giwacu kumae, Etimo gin ceke ber; eketho ju ma ithgi dhing’ giwinjo man ajuba de giweco.”​—Marko 7:37.