Udu ma Yesu timo m’enyayu ko cam ni dhanu uwang’u igi lii. Pieno giwacu nia, “maeni jabila andha m’ubebino i ng’om,” ma en e Masiya, man andhandha ebibedo rwoth ma cuu. (Yohana 6:14; Poi mi Cik 18:18) Wang’ acel gipangu lembe kara gimak Yesu man gikethe ni rwoth.

Kinde ma Yesu unyang’ nia gibepangu lembe pi nikethe ni rwoth, elalu udul dhanu man eyero ni julubne giidh yei. Gibecidho kani? Gibecidho i Bethsaida, ing’eye gibikadhu i Kapernaum. Yesu uweko gicidho, en ke eidho iwi got eni kende diewor nica pi nirwo.

I dhu apokapiny ma dwi ulero maber, Yesu ugam uneno yei ku bor. Re yamu ubekoto ma tek iwi nam man mujanga ma dongo ubebino iwie iwie, uketho julub ‘gibesendri ku kiewo, kum yamu ubeai yor i wang’gi.’ (Marko 6:48) Yesu uloro kud iwi got man ecaku wotho ku wi pii pi nibino i bang’gi. Nitundo saa maeno nwang’u “gikiewo ma yenyo romo [kilometre] abic kadi [abusiel].” (Yohana 6:19) Kinde ma julub gineno Yesu ubebino ibang’gi, lworo umakugi, e gikok kumae: “En e ulelu!”​—Marko 6:49.

Yesu ugam utego cwinygi, ewacu kumae: “Cwinywu bed tek; meni an; lworo kud unegwu.” E Petro wacu ire kumae: ‘Rwoth, tek en e in, wac ira abin i beng’i ku wi pii.’ Yesu dwoko ire kumae: “Bin,” e elor kud i yei, man ewotho ku wi pii, pi nibino ibang’ Yesu. Ento kan eneno yamu, lworo make; e kan emaku mwony ekok, ewacu kumae, “Rwoth, lara do.” E ndhundhu Yesu rieyo cinge, man emake, ewacu ire kumae: “E in, ma yioyic peri nok, cwinyi bedo jiji nedi?”​—Matayo 14:27-31.

Petro giku Yesu giidho i yei, e nam ukwio. I julub ulund uwang’ lii; re nyo nwang’u igi copo wang’ lii kumeno? Ka nwang’u ginyang’ i thelembe mir udu ma Yesu uai utimo saa moko nyanok iwang’e, m’enyayu ko “lungu kwen” ni dhanu dupa, nwang’u gicopo zungo ngo woth ma Yesu uwotho ko iwi pii man yamu m’ejuko. Kawoni gilund ginyutho ire woro ma lee, giwacu kumae: “In i Wod Mungu andha.”​—Marko 6:52; Matayo 14:33.

Gigam ginyiko i Genezareti ma tie pambu m’upoto kpee, man ma cego nyingyen, ma nwang’ere yo piny mi Kapernaum. Gibolo nanga mi yei keca man giwok i dhu wat. Dhanu uwok ung’io Yesu tap, e gicokiri ku ju m’uai i pacu ma ceng’ini ceng’ini ku keca, gikelo jurutwoyo migi ibang’e. Saa ma jurutwoyone gimulo dhu kendi pa Yesu kende ci, kumgi kei wang’ acel.

Ikind saa maeno, udul dhanu ma gibino tie kinde ma Yesu unyayu cam gipoi nia Yesu umbe. E saa ma nyathi yei moko m’uai i Tiberia utundo, giidho i ie man gicidh giyenyo Yesu i Kapernaum. Kinde ma ginwang’e, gipenje kumae: “Japonji, ibino kakeni awene?” (Yohana 6:25) Calu ma wabineno, Yesu ujukogi re marac ungo.