Yohana ma Jababutisi ubino i otkol pi oro ma romo acel. Ebewinjo asu pi tic ma wang’u ijo ma Yesu ubetimo. Kepar kite m’ewinjere ko kinde ma julubne giyero ire nia Yesu ucero nyathin pa dhaku moko ma cware utho i adhura mi Nain. Re, Yohana ubemito ekewinj lembe m’uai atira i dhu Yesu nia pirang’o ebetimo tic maeca. Pieno Yohana uoro julubne ario. Eoro gicidh gitim ang’o? Gicidh gipenj Yesu kumae: “In i ng’atu m’ubebino, kadi wakur mange?”​—Luka 7:19.

Nyo penji maeno copo niwang’u iwa? Yohana re m’ubino ng’atu ma saa ma Yesu ubemaku batizo, uneno tipo Mungu ubeloro iwi Yesu man m’uwinjo dwal Mungu m’unyutho nia etie Wod Mungu. Wambe ku thelembe acel de niyero nia yioyic pa Yohana ujwik. Re saa maeno, Yesu uweco ngo wec mi pak pi Yohana. Ka Yohana utie ku yioyic matek, dong’ ke pirang’o eoro jucidh jupenj Yesu ku penji maeno?

Yohana ubemito eng’ei kende kende wec m’uai ku dhu Yesu en gire nia nyo etie andha Masiya. Calu ma Yohana ubeneno can i kol, winjo lembe maeno copo nimio tego i kume. Ecicopere nia penji ma Yohana upenjo ubino bende ku thelembe mange. Eng’eyo nia lembila mi Biblia unyutho nia Ng’atu ma Mungu uwiro bibedo ni ubimo man ni jalar. Re, Yohana ubino i otkol pi dwi ma lee ing’ei ma Yesu umaku batizo. Pieno Yohana ubemito eng’ei ka nyo ng’atu mange tie ma bibino, ma bitimo tic ceke ma jular juyero nia Masiya bitimo.

Kakare niyero ni Julub pa Yohana nia ‘An re m’atie ng’atu m’ubebino ne,’ Yesu unyutho kamaleng’ nia kan ebekeyo kwond tho matung’ tung’ m’unyang’ ikum dhanu, eno ceke utie ku kony pa Mungu. Ing’eye eyero ni julub pa Yohana kumae: “Wuci yer ni Yohana pi gin ma wuwinjo ku ma wuneno de: ju ma abinga maku nenopiny, weg abala bende gibewotho, weg joi de kumgi lony, ju ma ithgi dhing’ bende giwinjo, ju m’utho ndhu de gicer, jucan bende jubeyero igi lembanyong’a ma juboth ko.”​—Matayo 11:4, 5.

Yohana upenjo penji maeno pi ning’eyo nyo Yesu bitimo tic mange m’usagu m’ebetimo saa maeca man saa moko nyo ebigonye kud i otkol. Ento Yesu unyutho ni Yonana nia kud egen nia ebitimo udu mange m’ukadhu udu ma dong’ ebetimo.

Kinde ma julub pa Yohana gidok, Yesu uyero ni udul dhanu nia Yohana tie ng’atu ma dit nisagu jabila. Etie “jakwenda” pa Yehova ma juyero pire i Malaki 3:1. Etie bende jabila Eliya, ma juyero pire i buku pa Malaki 4:5, 6. Yesu ukoro kumae: ‘Andha awacu iwu kumae, kud ikind dhanu ma mon unyolo ng’atu moko mbe m’uwok madit ma sagu Yohana ma Jababutisi: ento ng’atu ma en e nok i Ker m’i polo e ma dit ma sage.’​—Matayo 11:11.

Wec pa Yesu ma nia ng’atu ma nyanok i Ker mi polo utie dit nikadhu Yohana, unyutho nia Yohana bibedo mbe i Ker mi polo. Yohana uyiko yo ni Yesu, ento etho ma fodi Yesu uyabu ngo yo mi cidho i polo. (Juebrania 10:19, 20) Re, Yohana utie jabila m’ugwoko bedoleng’ pare ni Mungu, man ebikwo i the Ker pa Mungu i ng’om keni.