Fodi Yesu ni i Yerusalem, i nindo mi ceng’ Sabatu. Kinde m’ebewotho ku julubne i adhura, giwok gineno ng’atu moko m’ubekwayu piny, etie abinga niai ma junyole. Julubne gipenje kumae: “Japonji, ng’a m’udubo, ng’atuni, kadi junyodo pare, ketho junyole ma wang’e cori?”​—Yohana 9:2.

Julub ging’eyo nia ng’atuno udubo ngo i wang’ nyoliri pare, ento gibino nipenjiri nyo ng’atu moko nuti m’udubo kinde ma fodi eni i min. Yesu udwoko igi kumae: “Ng’atuni dubo ngo kadok junyodo pare de: ento kara tic pa Mungu nyuthere i kume.” (Yohana 9:3) Pieno, utie ngo dubo pare kadi mi junyodo pare re m’uketho etie abinga. Ento nikum dubo pa Adamu re m’uketho dhanu ceke gibenyoliri ku kum mi dubo man ku mulima, calu ve nibedo abinga. Ento thowang’ pa ng’atuno umio kaka ni Yesu niketho tic pa Mungu unyuthere kamaleng’, calu m’ular unyuthere iwang’e kinde m’ekeyo kum dhanu ma kumgi ubino niremo.

Yesu unyutho thelembe m’ukwayu etim ko tic maeno piopio. Eyero kumae: “Wakowatimu tic pa ng’atu m’uora be ma fodi ceng’ nuti: diewor ubebino, ma ng’atu moko mbe ma copo timo ie tic. Ma fodi ani i ng’om an a der mi ng’om.” (Yohana 9:4, 5) Andha tho ubebino ikum Yesu, ma biroye i mudho mi liel, kaka m’ecopo timo ie ngo lembe moko. Ento ma fodi lembuno k’utundo ngo, etie der mi ng’om.

Nyo Yesu bikeyo kum ng’atuno? Ka eyo, ebikeyo kumene nenedi? Yesu ung’ulo lau i ng’om man enyobo laune ku ng’om. E eruco moko iwang’ abinga man eyero ire kumae: “Cidhi, ilog i kut mi Siloam.” (Yohana 9:7) E ng’atuno uworo lembe ma Yesu uyero. Kinde m’ecidh elogo, e wang’e caku neno piny! Kepar pi mutoro m’unege, pi wang’ ma kwong’a m’eneno ie piny!

Jirani pare ku dhanu mange m’ung’eyo nia etie abinga, igi uwang’ lii, uketho gipenjiri kumae: ‘Maeni en e ng’atu ma bedo bekwayu piny e ngo? Jumoko wacu kumae, En e en.’ Jumange ke uyio ngo lembuno, giwacu kumae: “Ungo, endre e calu en.” Ng’atu ma kume ukeine uwacu en gire kumae: “An a en.”​—Yohana 9:8, 9.

E gilokiri i bang’e, gipenje kumae: “Weng’i yabre nenedi?” Eloko igi kumae: “Ng’atu ma julwong’o Yesu etimo ulobo ewiro i wang’a de man ewacu ira kumae, ci Siloam, ilogi: ka kumeno acidho alogo, e wang’a lero.” E ing’eye gidok gipenje kumae: “Ng’atuno nikani?” Jakwaipiny uloko igi lembe kumae: “Ang’eyo ngo.”​—Yohana 9:10-12.

Dhanu utero ng’atuno ibang’ Jufarisayo. Jufarisayo de gimito ging’ei kite ma wang’e ukei ko. Eyero igi kumae: “Eketho ulobo i wang’a, man alogo, e aneno piny eni.” Nwang’u ukwayu anyong’a  uneg Jufarisayo pi jacan maeno ma kume ukei. Ento jumoko gicaku nicayu Yesu acaya kumae: “Ng’atuni ai ba Mungu ngo, kum ekwiro ceng’ sabatu ngo.” Re jumange uyero nia, “ng’atu ma jadubo copo timo giranyutha ma kumeni nenedi?” (Yohana 9:15, 16) E igi pokore.

Calu ma giwinjiri ngo i kindgi, gilokiri ibang’ ng’atu ma jukeyo kume, ma dong’ kawoni ubeneno piny, man gipenje nia: “Iwacu ang’o pire, ni weng’i m’eyabu?” Edwoko m’umbe jiji nia Yesu “tie jabila.”​—Yohana 9:17.

Juyahudi gikwero niyio lembuno. Giparu nia ng’atuno gidiko lembe ku Yesu kara giwond dhanu. Ginwang’u nia lemb’acel m’udong’ utie nipenjo junyodo pa ng’atuno, ka nyo andha ebino abinga.