Yesu ubino i Yerusalem pi Foc mi yabu dhu hekalu (kunoke, Hanukah). Foc maeni jubed jutimo pi nipoi pir hekalu ma judok juthiero kendo. Oro dak acel iwang’e, Jabim ma nyinge Antiokus Epifanes mir ang’wende, mi ng’om mi Syrie, ugam ugiero pemblam ma dit i od hekalu pa Mungu. I ng’eye, wot Jayahudi moko ma tie jalam, gimayu Yerusalem cen kud i cinge, man gidok githiere kendo ni Yehova. Niai eca ci, jubed jutimo foc mi yabu dhu hekalu kubang’ oro, i nindo 25 mi dwi mi Kislev, dwi maeno umaku kum thum mi dwi mir apar acel, ku caku mi dwi mir apar rio.

I nindo moko i saa mi koyo, Yesu ubino niwotho kud i kind mbegi mir hekalu ma Suleman ugiero. Juyahudi giwok ginwang’e, man gitieko dhoge. Gipenje kumae: ‘Ibiketho cwinywa bibedo jiji rokani? Tek in i Kristu, yer iwa kele.’ (Yohana 10:22-24) Iparu Yesu bidwoko wang’ penji migi nenedi? Edwoko igi kumae: “Ayero iwu, man wuyio ngo.” Yesu uyero ngo igi ngbeng’ ngbeng’ nia etie Kristu, calu m’egam eyero ni Dhasamaria i dhu kulo. (Yohana 4:25, 26) Re elar enyuthere igi I wang’e kumae: ‘Ma fodi jukunyolo Abraham ungo, nwang’u anuti.’​—Yohana 8:58.

Yesu ubemito dhanu ginyang’ gin gigi nia etie Kristu, ma gipor ko tic pare ku tic ma lembila ular uewo nia Kristu bitimo. Eno re m’uketho saa moko, ebed ewacu ni julubne nia kud giyer ni dhanu mange nia en e Masiya. Ento kawoni eyero ngbeng’ i dhu Juyahudi maeni ma jujai kumae: ‘Tic m’atimo i nying’ Vwa, ubetuco pira. Ento wuyio ngo.’​—Yohana 10:25, 26.

Pirang’o gibeyio ngo nia Yesu tie Kristu? Yesu uwacu igi kumae: ‘Wuyio ngo, kum wuni i kind rombe para ngo. Rombe para winjo dwanda, man ang’eyogi, gilubo ng’eya de: amio igi kwo ma rondo ku rondo; man gibirwinyo ki ngo, ng’atu moko mbe de ma bimayugi kud i cinga. Gin ma Vwa umio ira usagu ceke.’ I ng’eye enyutho pi winjiri ma ceng’ini m’utie i kindgi giku Won kumae: “An waku Vwa wan acel.” (Yohana 10:26-30) Saa maeno Yesu ubino i ng’om, Won ke i Polo, pieno ecopo ngo niyero nia en ku Won gitie acel m’acel. Ento gidikiri i i acel, man gitie ku lembakeca de acel.

Lembe ma Yesu uyero unyayu kwinyo i Juyahudi uketho giting’o kidi pi nicanye kara ginege. Lembuno unyayu ngo lworo i Yesu. Eyero igi kumae: “Tic maber dupa m’uai ba Vwa adaru nyutho iwu; kum tic maeni ma kani ma wucanya ku kidi pire?” Giloko ire kumae: “Wacenyi ngo ku kidi kum tic ma ber, ento kum icido Mungu; kum in . . . ikethri giri ni Mungu.” (Yohana 10:31-33) Yesu uyero ngo nyanok de nia etie mungu. Dong’ ke pirang’o gibekelo adote maeno i wie?

Pilembe Yesu uyero nia etie ku tego, ma Juyahudi ging’eyo nia Mungu kende re m’utie ko. Ku lapor, eyero pi “rombe” kumae: “Amio igi kwo ma rondo ku rondo.” Gin maeno dhanu copo timo ngo. (Yohana 10:28) Juyahudi gidieng’ ungo ku lembe ma Yesu ugam uyero terere igi nia, tego m’etie ko, uai i bang’ Won.

Pi nikwero lembe migi, Yesu upenjogi kumae: ‘Egorere ngo i cik mu [i Zaburi 82:6] nia, awacu kumae: Wun wu mungugi? Tek elwong’ogi mungu, ma lem pa Mungu uwok i bang’gi, . . . wuwacu ira, an m’atie ng’atu ma Wego udwoko leng’ man eoro de i ng’om kumae: iyero lembacidi; kum awacu nia, An a Wod Mungu?’​—Yohana 10:34-36.

Andha, Lembagora ulwong’o kadok jupoklembe ma pwe ngo de nia “mungu.” Dong’ pirang’o ke Juyahudi gibekelo adote mi vupo iwi Yesu pi wec m’ewacu nia “An a Wod Mungu”? Edok eyero lembe moko ma copo cwalugi ginyang’. Eyero kumae: “Tek atimo tic pa Vwa ngo, kud wuyia.  Ento tek atimogi, kadok wuyia ngo, wuyi tic: kara wung’ei wuyi de ya Wego tie i acel kuda, an de i acel ku Wego.”​—Yohana 10:37, 38, NWT.

Juyahudi gimito gimak Yesu pi wec maeno, ento eringo igi kendo. Eai kud i Yerusalem man ekadhu loka Kulo Yordan kaka ma yang’ Yohana ma Jababutisi ubed umio ie batizo ni dhanu, oro ang’wen i wang’e. Ecicopere nia kabedo maeno utie ngo bor akeca ku yo piny mi Nam Galilaya.

Udul dhanu gibino ibang’ Yesu man giyero kumae: “Yohana timo giranyutha moko ngo: ento gin ma Yohana yero pi ng’atuni en andha.” (Yohana 10:41) Pieno, Juyahudi mapol giyio Yesu.