Fodi asu Yesu ni i agba mi otbak i Yerusalem. Anyong’a ubenege pilembe “kind udul dhanu dupa giyie.” Ento lembuno ubefoyo ngo i judong dini acel de. Pieno gioro juaskari ucidh umak Yesu. (Yohana 7:31, 32) Re Yesu upondo ngo igi.

Ento emedere asu niponjo iwang’ dhanu kamaleng’ i Yerusalem, ewacu kumae: “Nindo ma nok wanuti wakudu, man acidho ba Ng’atu m’uora. Wubiyenya, ere wubinwang’a ngo: e ka ma ani i ie, wucopo bino ngo.” (Yohana 7:33, 34) Juyahudi ginyang’ ungo, pieno gipenjiri ikindgi kumae: “Ng’atuni bicidho kani ma wakubinwang’e ngo e? ebicidho ba ju m’ulal i kind Juyunani, man ebiponjo Juyunani? Lembe maeni m’eyero kumae lembang’o, wubiyenya, ere wubinwang’a ngo; ka m’abedo i ie de wucopo bino ngo?” (Yohana 7:35, 36) I andha, Yesu ubino weco pi tho pare man pi cer pare pi kwo mi polo, man judegine gicopo lubo ngo toke kuca.

Nindo mir abiro mir agba uromo. Kubang’ kugweno mi ceng’ agba, jalam konjo pii ma jutwomo kud i kut mi Siloam, man pige mol nitundo i the tiend pemblam mir hekalu. Saa moko nyo pi nipoyo wi dhanu ikum lembe maeno ma ging’eyo cuu, Yesu ukok kumae: ‘Tek rieu nego ng’atu moko, dong’ ebin i bang’a emadhi. Ng’atu m’uyia, kulo mi pii mi kwo bithwogre kud i ie, calu lembagora pa Mungu wacu.’​—Yohana 7:37, 38.

Yesu ubino weco iwi lembe ma bitimere kinde ma tipo maleng’ biwiro julubne kara gicidh gikwo i polo. Tipo maleng’ne ugam uwirogi ing’ei tho pare. Kulo madit ma mio kwo ucaku nimol i ceng’ Pentekoste oro acel ing’ei  tho pa Yesu, kinde ma ju ma tipo uwiro gicaku niponjo lemandha ni dhanu.

Dhanu moko kinde ma giwinjo ponji pa Yesu giwacu kumae: “Maeni en e jabila andha;” copere gibino weco iwi jabila ma jular juewo pire ma dwong’ nisagu Musa. Dhanu mange giwacu kumae: “Maeni Kristu.” Ento dhanu moko giwacu kumae: “Ang’o, Kristu ai i Galilaya? Lembagora pa Mungu wacu ngo nia Kristu ai ba kodhi Daudi, man i Bethlehem, pacu ma yang’ Daudi bedo i ie?”​—Yohana 7:40-42.

E i dhanu upokere. Jumoko gimito gimak Yesu, re giketho ngo cing’gi ikume. Juaskari gigam gidok ma cing’gi nanu ma Yesu umbe; kinde ma gitundo, julam ma dongo ku Jufarisayo gipenjogi kumae: “Wukele ngo nedi?” Juaskari giloko lembe kumae: ‘Ng’atu ma fod’uweco kumeca mbe.’ Ku ng’ecwiny, judong dini maeno gicayu askari ku wec mir ang’ale kumae: “Wun bende wurwinyo? kind jubim moko nuti m’uyie, kadi kind Jufarisayo de? Ento udul dhanu maeni m’ung’eyo cik ungo gibedo akwong’a.”​—Yohana 7:45-49.

Kinde ma Nikodem ma tie Jafarisayo man ma tie acel m’ikind dhanu mi dilo mi Sanedrini uwinjo kumeno, emaku wec man ecero bang’ Yesu. Nwang’u oro ario ku nusu kumeni iwang’e, Nikodem ular ubino ibang’ Yesu uthieno moko man eyie. Kawoni Nikodem uwacu kumae: “Cik mwa poko lembe pa ng’atu moko, ma k’elar ewinjo ngo, eng’eyo gin m’etimo de ngo?” Juwagi ma gibino kugi gilund gicero bang’gi kumae: “In bende in i ng’atu m’i Galilaya? Koiyeny, inen de jabila moko mbe m’uai i Galilaya.”​—Yohana 7:51, 52.

I andha, Lembagora uyero ngo thwolo thwolo nia jabila moko biai kud i Galilaya. Re Lembe pa Mungu ular uewo nia “Galilaya mi thek” bineno “der ma dit”; eno unyutho nia Kristu biai kud i adhura maeno. (Isaya 9:1, 2; Matayo 4:13-17) M’umedo maeno, Yesu unyolere i Bethlehem calu ma lembila ular uewo man etie bende kodhi pa Daudi. Kadok nwang’u Jufarisayo ging’eyo lembuno de, re ubenen nia gin re ma gimoyo rwonglembe mi ndra ku nying’ Yesu, uketho dhanu ging’eyo ngo lemandha iwi Yesu.