Kinde ma fodi Yesu utie asu ceng’ini ku Yerusalem, Juyahudi mapol gibino i bang’e. Jumoko gimito giwinj lembe pare, jumange ke gimito gikethe i amulaic. Ng’atu acel m’ikindgi, m’ung’eyo Cik lee, ubin upenje kumae: “Japonji, atim ang’o kara acam pacu mi kwo ma rondo ku rondo?”​—Luka 10:25.

Yesu unyang’ nia ng’atuno ubino ngo kende kende nipenje penji kara enyang’ iwi lembe moko. Ecicopere nia emito Yesu udwok wang’ lembe moko m’unyai ng’ecwiny i Juyahudi. Yesu uneno nia ng’atuno utie ku paru moko m’ekanu i wie. Pieno edwoko lembe ku rieko i kite ma romo golo wi paru pa ng’atuno.

Yesu upenje kumae: “Ang’o m’ugore i ciki? Isomo nenedi?” Ng’atuni uponjo Cik pa Mungu, pieno edwoko wang’ lembe nimakere ku cikne. Eyero lembe ma nwang’ere i Poi mi Cik 6:5 man Lembe mi Julawi 19:18, m’uwacu kumae: “Ibimaru [Yehova] Mungu peri kud adundeni ceke, ku ng’eyong’ec peri ceke, man ku tegoni ceke, ku pidoii ceke de; man wedwu calu in giri.” (Luka 10:26, 27) Nyo edwoko rac?

Yesu uyero ire kumae: “Idwoko lembe cu: tim maeni e ibibedo kwo.” Nyo wec uthum keno? Ng’atuno ubemito ngo dwokowang’ lembe ma tap kende; “eyenyo enyuthre nia e pwe,” kara junen nia paru pare tie cuu man nia eng’eyo nikwo ku dhanu niloyo zoo. Pieno epenjo Yesu kumae: “Wada en e ng’a?” (Luka 10:28, 29) Penji maeno tie nyanok, re eketho lembe dupa i ie. Nenedi?

Juyahudi ging’eyo nia ka juweco pi ‘wadijo,’ nwang’u jubeweco kende kende pi dhanu ma giworo suru mi Juyahudi, man ubenen ve lembe ma nwang’ere i buku mi Lembe mi Julawi 19:18 de ucwaku lembuno. Pieno Jayahudi copo niloko nia “cik uyio ngo” nidikiri ku ng’atu m’utie ngo Jayahudi. (Tic mi Jukwenda 10:28) Pieno ng’atuno ku julub pa Yesu moko de gicopo paru nia ka gibekwo maber ku Juyahudi wadgi, eca nwang’u gibetimo bedopwe. Ento ka gitimo ng’atu ma tie ngo Jayahudi rac de, lembe moko mbe, pilembe etie ngo ‘wadgi.’

Yesu copo nitiro paru maeno nenedi m’umbe ninyayu ng’ecwiny i ng’atuno man i Juyahudi mange? Etiro parune ku lemb’atada ma e: ‘Ng’atu acel uai i Yerusalem eloro piny i Yeriko; epodho i cing’ jukwo, m’uwodho bongu pare man gifode, e gicidho, giweke ceng’ini i kum tho.’ Yesu umedo kumae: “Etimbre nia jalam acel ubeloro piny kud i yojuno: e kan enene, ekadhu ku ng’et yo kucel. Jalawi bende kumeca, kan ewok kakeca, enene de, e ekadhu ku ng’et yo kucel. Ento Jasamaria acel, i woth pare, ewok ka ma eni i ie: kan enene de, ngisi nege i kume.”​—Luka 10:30-33.

Ng’atu ma Yesu ubekoro lemb’atada maeno ire ung’eyo nia julam ku julawi mapol ma gitimo tic i hekalu, gikwo i Yeriko. Ka giai kud i hekalu gibedok, giwotho pi kilometre 23. Yo ne utie yo marac, jukwo bepondo i ie. Nyo julam ku julawi gikonyo ngo Jayahudi wagi ma ginwang’u upodho i peko? Yesu unyutho i lemb’atada maeni nia gikonyo ngo. Ng’atu acel m’ukonyo utie Jasamaria, ma tie dhanu m’ikind thek ma Juyahudi gidagu.​—Yohana 8:48.

Jasamaria ukonyo Jayahudi m’unwang’u ret maeno nenedi? Yesu umedere kumae: “Ebino de i bang’e, ekonjo mo ku pigulok iwang’ rem pare, etwio de; man ekethe wi kana pare gire, etere de i odwelo, man egwoke. Urwone ewodho denarii ario, emio ni won ot, ewacu kumae, gwoke; piny peri m’uoi ma sagu, kan adwogo, abiculo wang’e iri.”​—Luka 10:34, 35.

Kinde ma Yesu ma tie Japonji madit udaru lemb’atada maeno, epenjo ng’atuno ku penji m’ucwale i parulembe. Epenje kumae: “I kind juadek  maeni, iwacu nyo, makani m’unyuthre nia en e wadi ng’atu m’upodho i kind jukwo?” Cibedo ve ng’atuno copo winjere cu ngo kan edwoko nia “Jasamaria,” pieno edwoko nia tie “ng’atu ma kisa nege i kume.” Kawoni ponji ma Yesu umito niweco i wie i lemb’atada pare unen kele. Uketho ewacu ire kumae: ‘In de cidh itim kumeno.’​—Luka 10:36, 37.

Eno tie bodho mi tuko ngo! Ka nwang’u Yesu uyero atira atira ni ng’atuno nia Jayahudi ngo de tie wadi, nyo nwang’u en ku Juyahudi mange de ma gibino winjo Yesu gicopo niyio lembe maeno? Ubenen ve ungo. Lemb’atada ma yot ma Yesu utadu, ma juwinj pare ginyang’ i ie maber, uketho dwokowang’ penji ma nia, “wada en e ng’a?” unyuthere kamaleng’. Ubenen nia ng’atu m’utie wadijo mandha utie ng’atu ma nyutho mer, man ma timo bero, ma Lembagora ubekwayu nia wan ceke watim.