Yo nyangu, i theng got mi Zeituni, i kilometre ma romo adek ku Yerusalem, junwang’u pacu mi Bethania. (Yohana 11:18) Yesu ucidho kuca i Bethania man ewok emondo i ot pa nyimego ario, Martha giku Maria. Nyimegone kud umegi ma nyinge Lazaru, gijolo Yesu ku yaw yaw pilembe etie jarimbgi.

Etie rwom madit nijolo Masiya. Martha ubemito ejol Yesu ku jol ma cuu mandha, pieno ecaku nitedo cam dupa dupa. Kinde ma Martha ubetimo tic, nyamin ma Maria ke ubedo pare i the tiend Yesu niwinjo ponji. I ng’eye nyanok, Martha ubin uyero ni Yesu kumae: “Rwoth, lembe pido ii ngo nia nyamira weka atim tic akenda? Ka kameno wac ire nia ekonya.”​—Luka 10:40.

Kakare nidhau iwi Maria, Yesu uwacu ni Martha nia kud edieng’ ikum giki dupa, ewacu ire kumae: ‘Martha, Martha, cwinyi pido man ubedieng’ de kum giki dupa: ento can lembe acel nuti: kum Maria foyo maka pare ma ber, ma jubimayu woko kud i bang’e ngo.’ (Luka 10:41, 42) Yesu umito ninyutho nia pire tie tek ungo nibayu saa akeca ikum tedo cam dupa. Cam moko nyanok ci uromo.

Nen pa Martha utie rac ungo. Emito ebed jajol. Re calu m’ebedieng’ akeca ikum giracama, ebekoso ponji ma pire tek m’uai ibang’ Wod Mungu! Yesu unyutho nia Maria utimo ng’iong’ic maber, ma bimio ire bero ma galu naka, ma ng’atuman m’ikindwa copo ninwang’u ponji ikum lembene.

I saa mange, Yesu uponjo lembe mange m’ukoc ku maeno, re ma pire tie tek lee bende. Jalub moko upenje kumae: “Rwoth, ponjwa ku rwo, cil calu Yohana bende ponjo julubne.” (Luka 11:1) Nwang’u Yesu ular uponjo julubne iwi lembe maeno i wi got, oro acel ku nusu udaru nikadhu. (Matayo 6:9-13) Ecicopere nia jalub maeni ubino mbe nindo nica, pieno Yesu udok kendo iwi lembe ma pigi tek m’eponjo. Etio ku lapor pi ninyutho nia pire tie tek niberwo areri.

‘Ng’a m’i kindwu m’ubedo ku jarimbe, m’ebicidho i bang’e ku diewor ma ling’, ebiwacu ire kumae, Jarimba, mi ira lungu kwen adek ni banja; kum jarimba m’uai i woth uwok i bang’a, man gin moko mbe kuda m’aketh i wang’e; e ebidwoko lembe kud i ot ebiwacu kumae, Kud icanda: kawono dhugola bedo acika, nyithindho para de nuti i bang’a wi kavuto; acopo ai iri ngo. Awacu iwu kumae, kadok aaya de ebiai ngo, ebimio ire de ngo kum en ejarimbe? Ento kum ekwayu asu ebiai ebimio ire calu ma cande ni i kume.’​—Luka 11:5-8.

Yesu umito nyutho ngo nia Yehova bemito ngo nidwoko wang’ kwac. Ento, emito ninyutho nia ka jarimo ma cinge nwang’ de umio gin ma jukwaye ko, m’umbe jiji, Wegwa mi polo ma jamer de bidwoko wang’ kwac mi jurutic pare m’ugwoko bedoleng’ migi. Yesu umedo kumae: ‘Awacu iwu kumae, wumeduru nikwayu, e ebimire iwu; wumeduru niyenyo, e wubinwang’u; wumeduru nidwong’o, e ebiyabre iwu. Kum ku ba dhanu ceke m’ukwayu gigamu; man ng’atu m’uyenyo enwang’u; ng’atu m’udwong’o de eyabre ire.’​—Luka 11:9, 10.

I ng’eye Yesu udok uketho peko akeca iwi lapor pa wego, ewacu kumae: “Makani m’i kindwu ma wode bikwaye ku lungu kwen, e ebimio ire kidi? Kadi rec, kan ebimio ire thwoli? Kadi tek ebikwaye ku tong’gweno, ebimio ire ithi? Ka kumeno tek wun, ma wurac, wung’eyo maram wumio ko giramia maber ni nyithindho mu, Wegwu ma ni i polo bimio tipo maleng’ m’usagu ngo ni ju m’upenje?” (Luka 11:11-13) Eno ubeketho cwinywa nia andha Wegwa utie ayika niwinjowa man nipong’o yeny mwa!