Yesu fodi utie asu i Yerusalem pi nindo mir agba mi Otbak, ebemedere niponjo dhanu ku lemandha. Juyahudi moko ma gibino keca giwacu ire kumae: ‘Wan wakodhi [Abraham], fodi wabedo ng’eca pa ng’atu moko ngo.’ Yesu udwoko igi kumae: ‘Ang’eyo nia wu kodhi Abraham; ento wuyenyo ka nega, kum lembe para mbe i iwu. Ayero gin m’aneno ba Vwa: wun bende wutimo gin ma wuneno ba wegwu.’​—Yohana 8:33, 37, 38.

Yesu uyero igi kamaleng’ nia Won ukoc ku weggi. Calu ma ginyang’ ungo i lembe ma Yesu uyero, giyero ire kendo kumae: ‘Wegwa en e Abraham.’ (Yohana 8:39; Isaya 41:8) Andha gitie anyoli m’uai i Abraham. Pieno giparu nia gitie ku yioyic marom ku pa Abraham ma tie jarimb Mungu.

Ento, Yesu udwoko igi lembe ngbeng’ i dhoggi kumae: ‘Tek wu nyithindho pa Abraham kuno di wutimo tic pa Abraham.’ Wod mandha kwanyu lapor pa won. Yesu umedere niyero igi kumae: ‘Ento kawoni wuyenyo ka nega an m’a ng’atu m’ayero iwu lemandha, m’awinjo ba Mungu: maeni Abraham utimo ngo.’ I ng’eye Yesu uyero igi wec ma e m’unyotho wigi: “Wutimo tic pa wegwu.”​—Yohana 8:39-41.

Fodi asu Juyahudi gibenyang’ ungo iwi lembe ma Yesu ubeweco i wie. Giloko nia gitie anyoli ma dhe, giwacu kumae: “Junyolowa ku tarwang’ ungo; Wegwa acel, en e Mungu.” Nyo Mungu utie Wegi andha? Yesu udwoko igi kumae: “Dok Mungu en e Wegwu, kuno di wumara: kum aai ba Mungu abino eni; kum abino gira ngo, ento eora en.” Yesu upenjogi ku penji moko m’edok edwoko wang’e en gire kumae: ‘Nedi wunyang’ ungo i wec para? En e kum wucopo winjo lembe para ngo.’​—Yohana 8:41-43.

Yesu unyutho igi matoke ma junwang’u ka jukwere. Ento kawoni eyero igi ter kumae: “Wun wu pa wegwu ma wonabali, e wuyenyo wutim awanya ma rac pa wegwu.” Wegine tie ng’atu ma nenedi? Yesu unyutho terere nia etie “janek, man ecungo ngo i lemandha, kum lemandha mbe i ie.” Yesu umedo kendo kumae: “Ng’atu ma en e pa Mungu ewinjo lembe pa Mungu: kum lembe nini wuwinjo ngo, kum wu pa Mungu ngo.”​—Yohana 8:44, 47.

Pokolembe maeno ukeyo i Juyahudi, e gidwoko ire kumae: “Wayero dre ngo nia, i Jasamaria, man pajogi ni ii?” Wec ma giyero nia Yesu tie “Jasamaria,” ubenyutho nia gicaye. Ento Yesu udieng’ ungo kud ayany migine, e ewacu igi kumae: “Pajogi mbe i ia; ento ayungo Vwa, man wun re ma wuketho abedo umbe yung.” I ng’eye, etimo lembang’ola m’unyutho nia lembe m’eai eyero pire tie tek. Ewacu kumae: “Tek ng’atu moko woro lem para, ebineno tho ki ngo.” Emito ngo niyero nia jukwenda ku julub pare mange gibitho ngo. Ento, emito yero nia gibinwang’u ngo nyoth ma rondo ku rondo, ma tie “tho mir arionde,” niwacu tho m’umbe genogen mi cer.​—Yohana 8:48-51; Lembanyutha 21:8.

Ento Juyahudi ginyang’ i wec pa Yesu ku kum. Giwacu kumae: ‘Kawono wapoing’eyo nia pajogi ni ii. Abraham utho ku jubila bende; man iwacu kumae, tek ng’atu moko woro lem para, ebibilo tho ki ngo.’ In i dit ma sagu wegwa Abraham, m’utho? . . . ikethiri ni ng’a?’​—Yohana 8:52, 53.

Yesu ubenyutho kamaleng’ nia etie Masiya. Ento kakare niyero igi atira nia etie Masiya, ewacu kumae: “Tek ayungra gira, nwang’u dwong’ para en e gin moko ngo: en e Vwa e m’uyunga: ma wuwacu pire, nia en e Mungu mu; man wung’eye ngo: ento ang’eye; man tek awacu ya ang’eye ngo, abibedo jandra calu wun.”​—Yohana 8:54, 55.

 Kawoni Yesu udok kendo iwi lapor pa kwarugi m’ugwoko bedoleng’ pare. Ewacu kumae: ‘Wegwu ma Abraham anyong’a nege kum ebineno ceng’ para: man enene, anyong’a nege de.’ Abraham uketho genogen pare i lembang’ola pa Mungu, man ebino nikuro bino pa Masiya. Juyahudi giyio ngo lembe m’eyero, uketho giwacu kumae: ‘Rundi peri fodi pier abic de ngo, kadong’ ineno Abraham ne [nenedi?]’ Yesu udwoko igi kumae: ‘Andhandha, awacu iwu, Ku kwong’a ma fodi jukunyolo Abraham ungo, nwang’u anuti.’ Eno ebino niweco iwi kwo pare m’ebino ko ku kum mi tipo i polo, i wang’ nibino i ng’om.​—Yohana 8:56-58.

Wec ma Yesu uyero nia ma fodi Abraham umbe nwang’u enuti, unyayu kwinyo i igi, uketho giting’o kidi kara ging’ure. Ento Yesu uai ku keca ma gitimo ngo gin moko i kume.