I nindo ma tokcen mir agba mi otbak, niwacu nindo mir abiro, Yesu ubeponjo i hekalu, i kakare moko ma julwong’o “kakanpiny.” (Yohana 8:20; Luka 21:1) Copere nia kakare maeno nwang’ere i lelagang’ mi mon, ka ma dhanu beketho i ie giramia.

Uthieno, piny belero keca matar i nindo mir agba, pilembe juketho thethala ang’wen ma dongo; thethalaman utie ku sani ang’wen iwie ma jukonjo moo pong’ igi; lero pa thalane tek mandha man elero piny nitundo bor. Yesu ugam uyero lembe mae, m’upoyo wi dhanu iwi lero maeno ma gibeneno: “An a der m’i ng’om; ng’atu m’ulubo ng’eya biwotho i mudho ngo, ento ebibedo ku der mi kwo.”​—Yohana 8:12.

Jufarisayo gilund ging’olo dhu Yesu ku rac, giwacu kumae: “Inyutho lembe piri giri; nyutholembe peri en e andha ngo.” Yesu dwoko igi kumae: “Kadok anyuth lembe pira gira, nyutholembe para en e andha; kum ang’eyo ka m’aai i ie, ku ka m’acidho i ie de; ento wun wung’eyo ngo ka m’aai i ie, kadi ka m’acidho i ie de.” Emedo kumae: “I cik mu egore kumae, ya nyutholembe mi juario en e andha. An a ng’atu m’ubenyutho lembe pira gira, Wego m’uora de benyutho lembe pira.”​—Yohana 8:13-18.

Jufarisayo gikwero lembe ma Yesu uyero, pieno gipenje kumae: “Wuru nikani?” Yesu udwoko igi ku tegocwiny kumae: “Wung’eya ngo, kadok Vwa de: dok wung’eya kuno di wung’eyo Vwa bende.” (Yohana 8:19) Jufarisayo gimito kendo gimak Yesu, re giketho ngo cing’gi i kume.

Yesu udok kendo iwi wec m’elar eyero kumae: “Aai woko man wubiyenya, e wubitho i dubo mu: ka m’acidho i ie wucopo bino ngo.” Juyahudi ginyang’ ungo acel de i wec maeno, pieno gicaku penjiri kumae: “Ebinegre gire, kum ewacu kumae, ka m’acidho i ie, wucopo bino ngo?”  Ginyang’ ungo i wec ma Yesu uyero, pilembe ging’eyo ngo kaka m’eai i ie. E ekoro igi kumae: “Wun wuai piny; an aai malu: wun wu mi ng’om maeni; an a mi ng’om maeni ngo.”​—Yohana 8:21-23.

Yesu ubino weco iwi kwo m’elar ekwo ko i polo iwang’ nibino i ng’om, man emito yero nia en re m’etie Masiya kunoke Kristu ma jular jung’olo pire, ma judong dini maeno gibino nikuro. Ento gipenje ku cac ma dit kumae: “In i ng’a?”​—Yohana 8:25.

Yesu udwoko wang’ cac migi kumae: “Cil maeno bende m’ayero iwu ku kwong’a.” Yesu ubemito ging’ei Won, man bende ekoro thelembe m’uketho Juyahudi gicikiri niwinjo Wod, ewacu kumae: “Ng’atu m’uora en e andha; man gin m’awinjo i bang’e, e ayero ginde ni ng’om.”​—Yohana 8:25, 26.

Ing’eye, Yesu unyutho genogen m’etie ko ibang’ Won, ma Juyahudi gimbe ko acel de, eyero kumae: “Ka wudaru ting’o Wod dhanu malu wubilund ng’eyo nia an a en man nia atimo gin moko gira ngo, endre ayero gin maeni calu Wego ponja ko. Man Ng’atu m’uora eni karacelo kuda; eweka kenda ngo, kum atimo gin maeni thiri thiri ma nyayu mutoro i ie.”​—Yohana 8:28, 29.

E Juyahudi moko giyio Yesu, man Yesu uwacu igi kumae: “Tek wubedo i lem para, nwang’u wu julubna mandha; man wubing’eyo lemandha, e lemandhane bigonyowu.”​—Yohana 8:31, 32.

Re ni jumoko wec ma Yesu uyero nia gibibedo agonya uwok ni lembe ma welo. Pieno, gijai ni Yesu kumae: ‘Wan wa kodhi Abraham, fodi wabedo ng’eca pa ng’atu moko ngo: iwacu nenedi, wubigonjru?’ Juyahudi ging’eyo cuu nia saa moko gibino i the bimobim mi thek mange, re gibekwero kud julwong’gi ng’eca. Ento Yesu uwacu igi kamaleng’ nia fodi asu gitie ng’eca, eyero kumae: “Andhandha awacu iwu, ku ba dhanu ceke ma timo dubo en e jamiru kunoke ng’eca mi dubo.”​—Yohana 8:33, 34.

Calu ma Juyahudi gikwero nia gitie ngo ng’eca mi dubo, lembuno ukethogi i ariti ma lee. Yesu ukoro igi nia, “jamiru bedo i ot nja ngo: wod e ma bedo mi nja.” (Yohana 8:35) I andha, jamiru nwang’u mutuma ngo, man jucopo rieme kud i tic saa moko ci. Ento nyathiot ku nyathin mange ma dong’ udoko calu nyathiot bedo i ot “nja,” niwacu pi kwo pare zoo.

Pieno, lemandha iwi Wod re ma gonyojo magwei kud i dubo ma terojo i tho. Yesu uwacu kumae: “Ka kumeno tek Wod bigonyowu, wubibedo agonya andha.”​—Yohana 8:36.