Ing’ei ma Yesu ucer, eng’olo nia giromb ku jukwenda pare apar acel iwi got moko i Galilaya. Julub mange, ma jumoko m’ikindgi ular ubino ku jiji de gitie keca; wel migi romo dak abic. (Matayo 28:17; 1 Jukorinto 15:6) Re lembe ma Yesu udok uyero kawoni, uketho ng’atuman m’ikindgi uyio nia kara dong’ andha etie kwo.

Yesu unyutho nia Mungu umio ire ng’ol ceke, i polo man i ng’om de. E eyero igi kumae: ‘Ka kumeno wucidhi, wuketh [dhanu m’ikind] thek ceke dok julub, wumi igi babutisi ku nying Wego ku Wod man tipo maleng’: wuponjgi ya giwor gin ceke m’ang’olo iwu.’ (Matayo 28:18-20) Andha, Yesu udaru cer man pidoic pare utie nia tic mi rweyo lembanyong’a udong’ umedere asu.

Yesu umio tic mi ketho dhanu udok julub ni jumaco, jumamon, kud awiya ceke ma gibelubo toke. Ento judegi migi copo mito gijig nirweyo lembanyong’a man kud giponji, pieno Yesu utego cwinygi kumae: “Ng’ol ceke mire ira m’i polo ku m’i ng’om bende.” Wec maeno utie ku thelembe makani ni julubne? Eyero igi kumae: “Nen, wanuti wakudu thiri thiri, cil i kajik mi ng’om.” Yesu uyero ngo nia dhanu ceke m’ubetimo tic mi rweyo lembanyong’a bibedo ku copo mi timo udu. Ento tipo maleng’ bikonyogi.

Ing’ei ma Yesu cer, julubne ginene wang’ dupa ikind nindo pier ang’wen. Kadok nwang’u ging’ie ngo de, re “enyuthre gire igi ma kwo ku gin dupa ma piembre ngo,” bende eponjogi ku “[lembe] mi Ker pa Mungu.”​—Tic mi Jukwenda 1:3; 1 Jukorinto 15:7.

Ubenen nia saa ma fodi jukwenda gitie asu i Galilaya, Yesu uyero igi nia gidok i Yerusalem. Kinde m’erombo kugi i adhura kuca, ewok eyero igi nia, ‘ku giwok kud i Yerusalem, ento dong’ gikur lembang’ola ma Wego ng’olo, ma ewacu, yang’ wuwinjo i bang’a: kum Yohana mio babutisi ku pii andha ento wun re wubimaku babutisi ku tipo maleng’ ma fodi nindo dupa kukadhu ngo.’​—Tic mi Jukwenda 1:4, 5.

Yor ing’eye Yesu girombo kendo ku jukwenda pare. Etelo “wigi woko i ng’et Bethania,” ma nwang’ere i kor got Zeituni yo nyangu. (Luka 24:50) Kadok nwang’u Yesu udaru koro igi lembe dupa iwi dok pare i polo de, re fodi asu gibegeno nia i ayi moko, Ker pare bibedo iwi ng’om.​—Luka 22:16, 18, 30; Yohana 14:2, 3.

Jukwenda gilud gipenjo Yesu kumae: “Rwoth, idwoko ker ni Israel nindo maeni?” Edwoko igi kumae: “Meni iwu ngo ma nia wung’ei nindone kadi orone, ma Wego ketho gire ka tegone.” Ing’eye edok eketho peko kendo iwi tic m’ukwayu gitim, eyero kumae: “Wun wubinwang’u tego, nwang’u tipo maleng’ uwok i wiwu: man wubibedo jumulembe para i Yerusalem, man i Yahudi ngung’ ku Samaria de, man cil i tung’ ng’om bende.”​—Tic mi Jukwenda 1:6-8.

Kinde ma fodi jukwenda gini wi got Zeituni karacelo ku Yesu ma kawoni dong’ udaru cer, gineno ecaku idho i polo. E ndhundhu afuru gam uume iwang’gi. Ing’ei cer, Yesu umaku kum pa dhanu. Re kawoni eweko kum pa dhanu, m’enyuthere ko ni julubne, man eidho i polo ma dong’ etie giracwia mi tipo. (1 Jukorinto 15:44, 50; 1 Petro 3:18) Kinde ma jukwenda ging’ayu wang’gi gibeneno toke tel, ‘dhanu ario m’ukendo kendi ma tar’ ulund utundo rek i vutgi. Utie jumalaika ma gironyo kum pa dhanu; e gipenjo kumae: “Wu dhanu mi Galilaya, wucungo wubeneno i polo nedi? Yesu maeni, ma jujole kud i kindwu malu i polo no, ebibino kumeca calu ma wunene ram ecidho ko i polo.”​—Tic mi Jukwenda 1:10, 11.

Julub mandha pa Yesu kende re ma ginene saa m’ebeidho i polo. Kinde m’ebicaku bimo iwi  Ker pare, ebibino “kumeca,” niwacu julubne mandha kende re ma gibing’iyo nia ecaku bebimo.

Jukwenda gigam gidok i Yerusalem. Ikind nindo ma tung’ tung’ m’ulubo, gicokiri karacelo ku julub mange, man bende ‘Maria ma min Yesu, ku utumin mire de.’ (Tic mi Jukwenda 1:14) Gin ceke gibedo asu i rwo. Ikind lembe ma giberwo pire ne, acel utie ning’io jalub ma bibedo kaka Yuda Iskariote kara wel mi jukwenda udok apar ario kubang’e. (Matayo 19:28) Gimito ebed jalub m’ubino nuti kinde ma Yesu ubetimo tic pare man kinde m’ecer. E gigoyo gagi pi ninwang’u ng’atune; eni tie wang’ ma tokcen ma Biblia uwacu nia jugoyo gagi pi ning’eyo yeny pa Mungu. (Zaburi 109:8; Lembrieko 16:33) E ng’iong’ic upodho iwi Matia (Matiasi) ma copere ubino ikind dhanu 70 ma nindo moko Yesu uoro ucidh urwei lembanyong’a, e “jukwane ku jukwenda apar wi acel.”​—Tic mi Jukwenda 1:26.

Nindo apar ing’ei ma Yesu uidho i polo, agba mi Juyahudi ma julwong’o Pentekoste ugam uromo. Nwang’u julub ma romo 120 gicokiri i Yerusalem, i kusika ma malu. E rek kumeni, piny ucaku woi i ot zoo calu wavuvu ma tek m’ubekoto. Ndhundhu, leb ma calu lebmac ucaku nen iwi dhanu ceke ma gini keca. Wang’ acel julub ceke gicaku weco ku dhok ma nge nge. Andhandha eno tie tipo maleng’ ma Yesu ular ung’olo re m’uromogi!​—Yohana 14:26.